Sooq pioneeriusariaqarpunga?
1 Suliniuteqarnerup pissanganartup naammassineqarnissaa nallerparput. Hundredelippassuit kajumillutik pioneeritut kiffartulersut takullugit qiimmaallannaqaaq. Suliniuteqarneq naammassivoq, kajumissaarinerli ingerlaannassaaq, allaaserisaaqqallu tulleriiaartut „Sooq pioneeriusariaqarpunga?“ akissummik ima naggaserneqarput: „Jehovamut inoqatinnullu akiitsugaqarama.“ — Rûm. 1:14, 15.
2 „Akiitsugaqarneq“: Akiitsugaqarneq oqimaatsutut isigineqarajuppoq, qujamasullunili akisineq uummatikkut kajumilluni naammassipallakkusunnartarpoq. Asannittuliorfigineqarluta tatigineqarlutalu tukkorfigineqaraangatta akiumallugit periarfissarsiortarpugut. Inuunermilu misigisat pilluaatigilikkavut imaluunniit inuunermi nalillit pigilikkavut allattaaq paasisariaqagaat oqaluttuariumasarpavut. Paulusip oqaluussinissaminut ’pisassaqarfigineqarnini’ oqimaatsutut isiginngilaa — akerlianilli tamatuma anersaakkut kajuminnerulersippaa. Oqaluussinissaq pingaarteqaa, aap, taamaaliorumalluinnarpoq.
3 „Jehovamut“: Jehovamut akiitsugaqarnerput asanninneranit, ajunngingaassusianit nalliuttuingaassusianillu pissuteqarpoq. Qujamasungaarnitta paasitinnissaanut kajumeqaagut. (1 Juá. 5:3) Oqaluussinissamik peqqussut Biibilimi ersersinneqaqattaarpoq. Jesus arlalinnik assersuusiorpoq oqaluussinissatsinnut kajumississutaasinnaasunik. (Mat. 5:15) Sallusuissutsip qaamarnga pingaartipparput. Jehovap isumagaa uppernerup, neriunnerup asanninnerullu uagutsinnut erlinnarnerpaajunissaat inuunitsinnilu pingaarnerpaajunissaat. Guutip ’naneruuterput ikinnerpaa’ ’nappartap ataanut iligipput’ takuniarluta? Pioneeritut qaamasorput naneruuserfimmiitittarparput ’amerlasuunut qaammaqqutaaqqullugu’.
4 Kiffamik naakkittaatsumik assersuusiami isumakkeerfiginninnissaq kisiat pineqanngilaq, aammattaarli Jehovamut akiitsoqarnitsinnut eqqaasitsissutaalluni. (Mat. 18:23-35) Sumik isumakkeerfigisimaneraatigut eqqarsaatigigutsigu pingaartitsinerussaagut. Pioneeritut kiffartornerup tamatuminnga immikkut periarfississavaatigut. Suliassarput ilumoorukkutsigu Jehovap pilluaqqujumaarpaatigut. — Tus. 56:13.
5 „Inoqatitsinnut“: Inunnut ilisarisimanngisatsinnut pisussaaffeqarnerput taakkunannga ajunngitsuliorfigineqaqqaarnitsinnik tunngaveqanngilaq. Paulusip paasisimavaa silarsuup inui Jesus Kristusip aavagut illernartukkut pisiaasut, taamaattumillu misigaluni tamanna qanoq imminnut isumaqartoq paasisariaqaraat. Nammineq tammarnermit aniguisitaasimalluni misigisimavoq aamma allat aniguinissaannut ikiortariaqarlugit — taakku oqaluussifigineqarnissaminnik pisassaqartitaapput. (1 Tim. 1:12, 13) Jehovap pilluta iliuuserisimasaasa tunniulluinnarnermillu neriorsuuteqarnitta pisussaatippaatigut taassumunngalu inoqatitsinnullu akiitsugaqarlersilluta. Ilatta kiap allat annaakkumallugit sapinngisaminik iliorumassanngila? — Uss. 3:27.
6 Biibilimik ajoqersorneqarsimasumik nalunngeqatiginnissuseqarnissaq akiitsut qanoq iliuuseqarfigineqartariaqarneri nalilissagaanni pingaaruteqarpoq. Aalajangiussarput apeqqutaalluni nalunngeqatiginnissutsitta eqqartuussinnaavatigut nalerisimaartissinnaallutaluunniit imaluunniit qisuarianngitsoorluni. Illit sorleq qinissagaluarpiuk? Pioneeritut kiffartorneq inooriaasiuvoq pilluarnartoq, ’akiitsukkanulli’ akiliutissaatut periarfissatuaanngilaq. Pioneeritut kiffartulernissamut periarfissarsioraanni pilluaqquneqangaarnermik kinguneqarumaarpoq. Kiffartuussinerulerusullutik kajumittut tamarmik Vågn op!-imi 8. oktobari 2000-imoortumi qupperneq 15-imi siunnersuutit tallimat takusinnaavaat.