Sooq pioneeriusariaqarpunga?
1 ’Pilittatut sulininni ilumoorusukkama.’ (1 Kor. 4:2) Pioneeritulli kiffartorneq pilittamut qanoq attuumassuteqaramik? Indsigt i Den Hellige Skrift naapertorlugu pilittaq tassaavoq „illumi sulinermik aqutsisoq imaluunniit allap pigisaanik nakkutiginnittoq. . . .Pilittap akisussaaffia aamma . . .suliai [taamaattumik] kiffartornermut, Jehova Guutip kristumiumut paarititaanut, tulluartumik allaatiginninneruvoq. Jesusip ajoqersukkani tanitat ilumoortut nunarsuarmiittut ataatsimut ’kiffaq ilumoorlunilu silatuumik’ taavai.“ Naak Jesusip ’pigisani tamaasa’ ’Guutip naalagaaffia pillugu nutaarsiassap nuannersup oqaluussissutiginissaa ilanngullugu kiffamut taassumunnga paaritikkaluarai, aamma uagut tamatta immikkut pilittap suliassai suliassaraavut. — Mat. 24:14, 45-47.
2 Talantinik assersuusiaq eqqaamaviuk? (Mat. 25:14-30) Assersuusiaq Jesusip najuunnissaanik siulittuummut ilaavoq, ’ullullu kingulliit’ oqaluussinerlu ersarissumik ataqatigiissippai. Kiffat siulliit marluk paarisamik nalinga marloriaatinngortippaat, akissarsisinneqarlutillu. Kiffalli kingullersaata talantiutini toqqorpaa parisaminillu tamanik arsaarneqarpoq. Kiffani taakkunani sorleq assigaarput? Nammineq soqutigisaannavut ulapputigaavut, imaluunniit Naalakkap soqutigisaanik suliuarpugut? — 1 Kor. 9:16, 17.
3 Ukiualuit qaangiupput ataatsimeersuarnermi apeqqut saqqummiunneqarmat: „Suna pillugu pioneeriunnginnerit qinunikkut Jehovamut nassuiarsinnaaviuk?“ Pilittatut suliumalluta tunniulluinnarnerput eqqarsaatigalugu sukkulluunniit tamatuminnga immitsinnut killisiorluta aperisinnaavugut ilaqutariittullu oqaloqatigiissutigalugu. Qatanngut angut inuusuttoq oqarpoq: „Akornutissaqarsimanngilanga, kisianni iluarisannik aalajangersimasumik malittarisaqartarpunga, allanngortinniarlugu iliuuseqarfiginngisannik. Taava ataataga toqoriasaarpoq. Paasilerpara inuuneq qanoq qajannartigisoq inuuneralu pitsaanerpaamik atunngikkiga. Taamaattumik anersaakkut nalilinnut isiginnittaasera allanngortippara.
4 Imminut aperigit: ’Sapinngisara tamaat iliorpunga?’ Soorunami atukkavut assigiinngillat. Jehova nuannaartarpoq ’sapinngisat missiliorlugit’ kiffartoraanni ’sapikkat missiliorlugit pinnagu’. (2 Kor. 8:12) Taamaattumik kialluunniit allat eqqartuuttariaqanngilai.
5 Tunniulluinnarsimanerput ’ullut nungullugit’ eqqortinniarutsigu inooriaaseq suliffimmi suleruloorluta ilungersuutigerusussanngilarput, akerlianili periarfissarsiorusussaagut ’immitsinnut isumakkeerluta’. (Lúk. 9:23) Jehovamut tunniulluinnareerpugut, taamaattumillu taassumannga annertuunik akisussaaffeqatitaalernissarput kissaatigalutigu. Taamaattumik pioneeriunissaminngarnit suna pitsaanerua?
6 Tamanna atukkatillu naleqquttumik eqqarsaatigalugit pioneeritut kiffartornissaq eqqarsaatigeqqissinnaassaviuk? Aap, sooq pioneeriusariaqarpunga? ’Pilittatut sulininni ilumoorusukkama.’