„Sooq pioneeriusariaqarpunga?“
1 „Tunniulluinnarsimanera pissutigalugu pisussaaffigilerlugu misigigama.“ Jehovap pingaartippaa nuannaarnermik, pinngitsaaliissutaanngitsumik, kiffartussagitsinni. (2 Kor. 9:7) Tamannali qanoq pisussaaffittut misiginermut attuumassuteqarsinnaava? Qanorlu isumaqarpa tunniulluinnarnitta pisussaaffeqartikkaatigut?
2 Ulluinnarni pisussaaffivut sungiutiinnarsimavavut. Sulisutut suliffitsinnut pisussaaffeqarpugut. Angajoqqaat meeqqaminnut pisussaaffeqarput. Nakorsap ilinniagaqarsimanerata suliassaqartitaaneratalu kingunerisaannik ilikkakkani allat iluaqutissaannut atorumassavai. Pisussaaffiit tamakkua ilerasuuteqarani naammassigaanni nammagassatut oqimaatsutut isigineqarneq ajorput. Inuunermili siunertaqalersitseqataasarput.
3 Tunniulluinnarneq isumaqarpoq pigisamik inummilluunniit illernartutut atugassatut immikkoortitsineq. Upperisamut nassuerutiginninneruinnaanngilaq. Jehovamut tunniulluinnaraangatta taassuma pigilertarpaatigut. Jehovamut asanninnerput pissutigalugu piumassuseqarluta nuannaarutigalugulu imminut isumakkeerluta tunniuttarpugut, taannalu naalakkatut akueralugu. (Lúk. 9:23-25) Tunniulluinnarnitsigut kuisinnitsigullu aammattaaq oqaatsimik kiffartuuteqartussatut suliakkerneqarpugut, tamannalu isumaqarpoq piginnilersitta oqaluussisussatut immikkoortikkaatigut.
4 Pisinnaatitaaffik tamanna qanoq annertutigisumik ilungersuutigaajuk? Qanoq pisussaaffeqartigalutit misigaat? Jehovap eqqortumik ilimagaa uummatikkut, isummakkut tarnikkullu iluunngarluta nukivullu tamakkerlugit kiffartorfigissagitsinni. (Mák. 12:30) Nalunngilaa atukkavut assigiingiiaartuusut, asanninnermigullu nammineq aalajangiisippaatigut ’piffissaq immikkoortitaq’ qanoq annertutigisoq kristumiutut akisussaaffitsinnut suliassatsinnullu allanut atorumaneripput. — 2 Kor. 8:12; Gal. 6:4.
5 Inuuninnili allanngortiterinissat ajornanngila, taamaalillutit Jehovamut ersersinnerulersissinnaallugu tunniulluinnarsimanerpit isumaa paasilluarsimallugu? Jehovap kissaatigaa tunisinikkut nuannaarneq tamatta immikkut misigissagipput. (Uss. 11:25) Taamaattumik pingaaruteqanngitsut tamaasa, tassunga tamakkiisumik tunniulluinnarsimaninnut qulalersitsisinnaasut, killilersukkit, taamaalillutillu kiffartuutigisat naammatillugu. (2 Tim. 4:5) Qatanngut angut 28-nik ukiulik oqaluttuarpoq sooq 19-inik ukioqarluni tamakkiisumik kiffartulersimalluni: „Ilerasuutima isumakulutsissimavaanga suliffiga kisiat isumagivallaaqigakku, taamaallaallu piffissaq sinneruttoq Jehovamut atortarlugu.“
6 Naalagaaffik illernartuutitut akisuutut ippoq. (Mat. 13:44-46) Naalagaaffik pillugu oqaluussineq aamma illernartuuvoq, taamaattumik sapinngisatsinnik kiffartornerujumalluta ’pigisavut tamaasa tuninissaat’ kissaatigisariaqarpavut. Pioneeriusinnaaguit imaluunniit pioneeriuniarlutit periarfissarsiorsinnaaguit uummammik tamakkiisumik tunniulluinnarsimanerpit pisussaatissavaatit, taamaaliornikkut asanninnerit Jehovamut takutillugu. Saniatigut inuunerit imaqarnerulissaaq siunertaqarnerulerlunilu nuannaarnermik toqqissisimanermillu ulikkaarluni.