’Tamarmik ineriartuutissaagilit’
1 Qatanngutitsinnut tunngasuni tamani ineriartuutissaannik ajunngitsuliortassaagut. Ima isumaqarpoq tamatta anersaakkut ittumik illersoqatigiinnissarput soqutigisariaqaripput. Nioqqutissanik tuniniaaneq siuarsarniarutsigu kiffartuussiguttaluunniit sianigisariaqarparput qatanngutitsinnut naakkiussutaannginnissaat. — 2 Kor. 6:3; Fil. 1:9, 10.
2 Ilaat assigiinngitsunik ulorianarnerusumik ulorianannginnerusumilluunniit aallutaqartarput qatanngutitik pisisussatut isumalluutigalugit. Tuniniaasartoqatigiit ilaasa tuniniaasartutik kajumissaartarpaat kikkut tamaasa — ilaatigut uppeqatitik — pisisussatut isigisaqqullugit. Qatanngutit ilaat ikinngutiminnik katerisimaartitsisarsimapput niuernermut tunngasunik peqataalernissaannut kajumissaarniarlugit. Allat aallutatik siuarsarniarlugit peqquneqaratik misiligutinik, atuagassiaaqqanik, paasissutissanik Internettikkut båndiniluunniit uppeqatiminnut nassiussisarput. Taamatut periaarseqarnerup inatsisitigut ajornartorsiortitsilersinnaanerata saniatigut eqqortuliornerussava kristumiup uppeqatini anersaakkullu qatanngutini taamatut iluanaarutissarsiffiginiarpagit? Naamik! — 1 Kor. 10:23, 24, 31-33.
3 Mianersorit: Isumaqanngilaq kristumioqatigiit niueqatigiissinnaanngitsut. Kialuunniit nammineq tamanna aalajangigassaraa. Ilaalli niuernikkut isumaqatigiissuteqartarsimapput piumatuunermik siuarsaasumik, uppeqatiminnillu piginneqataasussarsiortarlutik imaluunniit aningaasaliisussarsiortarlutik. Niuernerpassuit ajalusoortarput, tamatumunngalu akuliussimasut aningaasarpassuarnik annaasaqartarput. Naak akuliuttut ajornanngitsumik aningaasarserusunnermik kajumissisinneqarsimagunaraluartut, ajalusoortoqartillugu isumassarsisimasoq pisuunngitsutut isumaqartariaqanngilaq. Siumut eqqarsaatigilluareersimasariaqarpaa niuerneq iluatsinngippat qatanngutit anersaakkut aningaasatigullu qanoq eqqorneqarsinnaanerat. Teokratiimi akisussaaffillit sulerinerlutik mianersuulluinnartariaqarpaat, allanit maligassatut isigineqaramik, ataqqineqarlutillu tatigineqaramik. Tatigisaanertik atornerlussappassuk kukkunerussaaq. Qatanngut taamaattoq allanik ataqqineerukkuni imaassinnaavoq ’illernartumik kiffartornermini’ pisinnaatitaaffini annaagai.
4 Anguniagarput tassaasariaqarpoq ’tamarmik ineriartuutaassasut’. (1 Kor. 14:26) Ilagiit iluani niuernerit niuernikkullu siuarsaaniarnerit suut tamaasa ingalassimaniartariaqarpavut. Biibilimik tunngavilimmik katerisimasarnitsinnut tamakku attuumassuteqanngilluinnarput. — Epr. 10:24, 25.