Kristusip asanninnera qisuariarfigilluarpiuk?
1 Naalakkami nunami inuunera eqqarsaatigalugu apustili Johannes allappoq: ’Soorlu ilani silarsuarmiittut asagai, taamaalluni naggatissamut allaat asavai.’ (Juá. 13:1) Eqqaaniaalluni nalliuttorsiornerup nalaani Kristusip asanninneranik ersersitsinerit annerpaartaat eqqarsaatigisarparput. Asanninnera qisuariarfigisinnaavarput utertitsissutip upperineratigut, oqaluusseqataalluarnitsigut aamma, Jesusitut, ’naggatissamut’ aalajaattuarniarluta aalajangernitsigut. — Mat. 24:13; 28:19, 20; Juá. 3:16.
2 Kristusip asanninnera qisuariarfigilluaruk: Jesus nunamiinnermini sapaatip-akunnera kingulleq suliniuteqarluarsimaqaaq. (Mat. 21:23; 23:1; 24:3) Aammattaaq Kristusimik malinnittutut Jehovamut kiffartornermi asanninnerup ’assoruunnerulersissavaatigut.’ (Luk. 13:24) Apriilimi oqaluusseqataanerusinnaavit suliniummut annerusumut peqataanikkut?
3 Ukioq manna Naalakkap unnukkorsiortitsinera pingasunngornermi apriilip 19-ani nalliuttorsiutiginiarparput. Pisussami tamatumani immikkut ittumi qassit najuutissappat? Uagut apeqqutaaneruvugut. Qaaqqorusutatit allattoreerpigit — Biibilimik atuaqqissaaqatitit, soqutiginnittut, ilaquttat, suleqatitit atuaqatitillu? Asannittumik qaaqqusissummik tunereerpigit? Eqqaaniaaffissaq ullualunnik sioqqullugu eqqaaseqqissamaarpigit? Biiliunneqarnissartik pisariaqartippaat? Aammattaaq utoqqaanertat qatanngutit oqaluussisarunnaarsimasut qaaqquniarpaat. Eqqaaniaalluni nalliuttorsiorneq ulluinnarmi weekendimiunngitsorlu pisussaammat najuuffiginissaa pingaaruteqannginnerulinngilaq.
4 Piareersarsimallutit takkukkina: Eqqaaniaalluta nalliuttorsioqataalerutta piareersarsimanissarput naleqquttumillu isumaqarnissarput pingaaruteqarluinnarpoq. Paulusip uppeqatini oqaaqqissaarpai pisussap pingaaruteqassusianik eqqarsaatiginneqqullugit. (1 Kor. 11:20-26) Ilaqutariittut Biibilimik atuaqqissaarnermi îvangkîlio Juánasip agdlagâ-ni, kapitalit 13-imit 17-imut atuarneqarsinnaapput, ilaqutariillu ataasiakkaarlutik Jesusip pilliutitut toqunerata imminut qanoq sunniuteqarneranik oqaluttuartillugit. Aammattaaq sapaatip-akunnerani eqqaaniaalluni nalliuttorsiornissap tungaanut ullormut Biibilimik atuagassaq puigorniaqinagu.
5 Kristusimut asanninnerput qamannga pivoq apriilillu 19-ata tungaanuinnaanani. Taanna naassaanngitsumut asassavarput. Ukioq manna eqqaaniaalluni nalliuttorsiorneq aalajangersimanitsinnik nakussatsitseqataassaaq.