Pioneeritut kiffartorneq — ataatatut
1 Jesajap allagaani kapitali 54-imi assersuutitigut Jehovap peqatigiissortaa kajumissaaruteqarpoq amerliartornissaq piareersimaffigeqqullugu. Amerliartornermut tamatumunnga peqataarurusuppit, tamatumunngalu atatillugu nuannaarnermik annerusumik nassataqarnera misigalugu? Meeqqatit pitsaanerpaamik kingornussaqatikkumavigit? Taamaappat Danmarkimi ataataasup isumai tulliuttut isumaliutigeriakkit.
2 „Maanna ukiut sisamat pioneeriusimavunga, isumaqarpungalu inooriaasiusoq pitsaanerpaaq. Uiulluni, ataataalluni, utoqqaanertaalluni saniatigullu pioneeriunissaq ajornanngilaq. Soorunami tamanna akeqarpoq, soorlu sunngifimmi soqutigisanut piffissakinnerulerneq, aappaatigulli ilaquttanut piffissaqarnerulernermik peqatigiillunilu iliuuseqarnerulernermik kinguneqarpoq. Tamanna ilaqutariittut nukittunerulersitsivoq. Assersuutigalugu periarfissarpassuaqarpunga meeqqakka marluk kiffartornermut ilagissallugit, ilaqutariinnullu iluaqutaanerata saniatigut meeqqat oqaluussinerup ikinngutinillu peqateqarnerup nuannersortai misigisimavaat.
3 Pioneeriuneq ilimagisannit oqinneruvoq. Suliffinnit sapaatip-akunneranut marloriarlunga sulinngiffeqarnissara aaqqissorsimavara. Ulloq siulleq kiffartornerinnarmut atortarpara, aappaalu suliassanut allanut pisariaqartunut immikkoortissimallugu. Sapaatip-akunnerata naanera tamaat kiffartornissamut immikkoortinneqarpoq — arfininngorneq gruppe peqatigalugu sapaallu ilaqutakka ilagalugit. Tamatuma saniatigut sapaatip-akunnerata ingerlanerani marloriarlunga unnukkut aalajangersimasunik angalaaqateqartarpunga, aammattaaq torrutiinnarlugu oqaluussinissara ilungersuutigaara.
4 Meeqqat ’Naalakkamit inertertarlugillu perorsassagaanni’ maligassiuilluarnissaq pingaaruteqarluinnarpoq. Aamma tassuunatigut pioneeriusinnaaneq pilluaqqussutaavoq. Pioneeritut ingerlaannassagaanni pisariinnerusumik inooriaaseqarnissap pisariaqassusianik eqqaasinneqartuarpugut. Silarsuarmi matumani neqerooruteqarfiusumi paasinnissinnaaneq atorlugu inuunerup ilumut qanoq imaqarneranik ilinniarfiuvoq. Ingammik nuannaarutigaara takullugu inooriaaseq pigisatulerinngissuseq ukiuni kingullerni aallutarisimasarput meeqqatsinnut aamma sunniuteqalersimasoq.
5 Ataataatut pioneeriusinnaassagaanni nuliaasup kaammattuinera pingaaruteqartorujussuuvoq. Soorunami nuliaasoq piumaffigineqarnerussaaq, taamaattumillu ilaqutariittut isumaqatigiissutaasariaqarpoq ilaqutariit inuunerat taamatut ingerlassasoq. Nuliama aalajaalluni tapersersortuarpaanga, uangali taanna pisariaqartitaalu eqqumaffiginiarnerusarpakka. Piffissaqarfiginiartarpara, paasitittuarsimavaralu ikiuinera assut pingaartikkiga. Ajornanngikkaangattaaq sapinngisannik suliarisariaqagaanit ikiorniartarsimavara. “
6 Qatanngut angut naggasiivoq: „Ataatatut pioneeriusinnaaguit periarfissiguk. Tassaavoq Jehovamut, ilaquttannut, ilinnut ilagiinnullu tunissutigisinnaasat pitsaanerpaaq. Qularutigissanngilattaaq Jehovap pilluaqqujumaaraa, kiami tamanna misigiumassanngilaa? “
7 ’Toqqit inittorsinnaaviuk’? Uniinnanngikkuit iliuuseqarlutilli taava immikkut ittumik ’uummatikkut iluunngaannit qiimmattassaatit’, soorlu Jehovap Esajas aqqutigalugu kiffani neriorsorsimagai. — Jes. 54:2; 65:14.