Aalersortinneq pillugu apeqqutit qanoq akineqassasut
1 Ussatit 15:28-mi ima allassimavoq: „Iluartoq oqalulersinnani eqqarsaqqaartarpoq.“ Minnerunngitsumik napparsimasutut aalersortinneq pillugu apeqqummut nammineq isumarput saqqummiuttussanngorutsigu pingaaruteqarpoq qanoq akissanerluta ’eqqarsaatigereersimagutsigu’.
2 Nakorsap iliuutsiminut pissutigisai tatigikkit. Tatiginninnginnermik ersersitsineq akerleriinnernik pisariaqanngitsumik kinguneqarsinnaavoq. Akilluarsinnaassagaanni paasisimasaqarluarnissaq aammalu piuaatsuunissaq mianerinnittuunissarlu pingaaruteqarput. (1 Pîtruse 3:15) Oqaluussinissaq siullerpaatinneqartariaqanngilaq. Nakorsat amerlanerit upperisarsiorneq tunngavigalugu akissutit (immaqa ingasaassiniarnertut isigisatik) tusaarumasanngilaat, kisianni napparsimasoq silassorissoq isumaliuutiginnilluartorlu oqaloqatigerusuttarpaat.
3 Taamaattumik nakorsamik oqaloqateqarnermi oqaluuserisaq tassaasariaqarpoq passunneqarnerup akuerisinnaasavit isumaqatigiissutiginissaa. Piumasariniaqinagu illit qanoq isumaqarnerit nakorsap paasissagaa, kisianni ilisimasariaqarpaa ataqqinissaanullu piumassuseqartariaqarluni. Paasiniaruk pilattaariaaseq illit pilatsissutigisassat misilittagaqarfigineraa, imaluunniit pilattaasartumut allamut innersuussisinnaanersoq.
4 Nakorsaq oqaloqatigigukku makinnissamik neriugisaq ingasaannaveersaaruk. Ilumoorpormi toqunissat kissaatiginnginnakku — inuujumallutilli. Taamaattuminguna napparsimmavimmut unitsinneqartutit. Toqorusunneq pineqanngilaq, kisianni qanoq inoorusunnerluni qinersisariaqarneq. Aammut NAAGGAARIT isumaqaruit Guutip inatsisaata malinnissaa pingaaruteqartoq iluaqutaasorlu, nakorsarli nassuiaaguk ’aammut naaggaarnerit’ isumaqanngitsoq ’inuunermut naaggaarnerusoq’.
5 Pingaarnerutiguk ukiuni kingullerni aalersuinermut taarsiullugu atorneqarsinnaasut nakorsat ilisimatusarneratigut pitsaanerujartortinneqarsimammata silatusaarnerussasoq taakkua atornissaannut periarfissaq inatsisinik tunngaveqartoq qinissallugu. Immaqa nakorsavit tamakku ilisimallugillu atulereersimavai. Taamaanngippat Jehovap Nalunaajaasuisuisa Napparsimmavinnut Paasissutissiisarfiannit paasissutissat nutaanerpaat pissarsiariumallugit neqeroorfigisinnaavat.
6 Oqaluussitilluta apeqqut taama akisariaqalerutsigu periaatsit tamakku malissinnaavavut. Akerlilersuisoqarniaannarpat Jesusip eqqunngitsumik unnerluutigineqarami periaasia malisinnaavarput. (Matîuse 27:11-14) Allat peqqusersuillutik aperisarput. Taakkua tunngaveqartunik eqqarsaatissikkusuppavut.
7 Naatsunnguamik Biibilimit takutitaqaruit isumatta nakorsat ilisimatusarnermi angusaannit nutaanerpaanit uppernarsineqarsimanera tikkuarsinnaavat. Nakorsat atuagassiaataanni silarsuarmi ilisimaneqartuni atuarneqarsinnaavoq nakorsat ilisimatusarnerat tunngavigalugu aalersuinermut, siornatigut pinngitsoorneqarsinnaanngitsutut isigisaasumut, taarsiullugit passusseriaatsit assigiinngitsorpassuit qinerneqarsinnaanngorsimasut. Nakorsat suli amerliartuinnartut ilisimallugillu periaatsit (nakorsaatitigut atortorissaarutitigullu) aammik pitsaanerulersitsitut aammattaaq aanaarpallaarnaveersaartitsisullu pilattaatillutillu aammik kaaviiaartitsisinnaasut atortarpaat. Nakorsat pikkorissut Jehovap nalunaajaasuinik aammik atuinatik paassutaqartarnermikkut misilittagaasa takutippaat Biibili tunngavigalugu aalajangernerput silatusaarnerusoq. Amerlanerusunik paasisaqarusuttut atuagassiaaqqamik Hvordan kan blod redde dit liv?-imik neqeroorfigisinnaavatit.
8 Aammut tunngatillugu isumatsinnut apeqqutit eqqarsaatigilluagaasumik akineqarpata paqumisunneq nungutinneqarsinnaavoq. Immaqa nakorsap tamanna pillugu oqaloqatiginissaa annilaangagineqalaarsinnaavoq imaluunniit apeqqut tamanna pillugu avoqqaarineqarsinnaavugut, kisianni taamatut pisoqarsinnaanera pillugu Jesus oqarpoq: ’Isumakulussanngilasi.’ Piareersarluarsimagutta paasisimasaqarluarlutalu Guutip anersaavata ajunngitsumik akinissatsinnut ikiussavaatigut. — Lúkarse 12:11, 12.