Pioneeritut kiffartorneq — inuusuttutut
1 1991-imi Afrikami Qiterlermi Kunngiitsuuffimmi illoqarfiit pingaarnersaanni Banguimi pioneerit atuarfiat 48-nik atuartulik ingerlanneqarsimavoq. Taakkua ilaat 21-t suli meeqqat atuarfianni atuartuusimapput. Sapaatip-akunnerata naanerini, ulluinnarnilu ualikkut qaammatillu atuanngiffeqarfiit oqaluussinermut ajoqersuinermullu atortarpaat. Afrikamiinnaq taamaaliorneq ajornannginnerami?
2 Naamik, sumiikkaluaraanniluunnit Jehovap anersaavanik sunnerneqartikkaanni ajornanngilaq. Pioneeritut kiffartornissamut siuariartorfiusumiinnissaq kisimi apeqqutaanngilaq. Pioneeritut kiffartorneq tassaavoq sallusuissummik nuannarinninnermik Jehovamut takutsitsineq. Jehova nuannaartarpoq inuusuttut kif-fartuukkusukkaanganni. — Tussiaat 110:3.
3 Qanoq iliorsinnaavit kajumissuseqarnatit misigiguit? Qatanngut angut inuusuttoq ima siunnersuuteqarpoq: „Ukiup ataatsip matuma siorna . . . imminut aperisariaqarsimavunga sallusuissut nammineq qularutiginnginneriga. Qularutigisimavara ilumut nammineq nuannaralugu imaluunniit ilaquttakka pissutigiinnarlugit sallusuissummiinnerlunga. Imminut misilikkumallunga Biibili atuaqqissaarsimavara, [siunnersorneqarnittut]. Maannakkut nuannaarutigalugu oqarsinnaavunga sallusuissut nammineq pissarsiarisimallugu. Piffissaq tamaat atorlugu oqaluussisartunngornissara qilanaaraara.“
4 Soqutiginarpoq pioneerit amerlasuut oqartarmata piffissaq tamaat atorlugu kiffartulersimannginnamik piumassuseqarnertik pillugu, kisiannili misigigamik Jehovamut pisussaaffeqarlutik. Inuunerminni atugarisamik ajornartinngimmassuk inuusuttuutillutik nalunaarsimapput. Amerlasuut taama kiffartornertik attatiinnarsimavaat, oqaluttuarpullu piumassuseqarneq nuannaarnerlu kiffartornermik ilisarnaatigilipallassimagaat misilittagaqarnerulerlutillu pilluaqqussuterpassuillu misigigamikkik. Amerlasuut oqaatigaat paasisimallugu pioneeritut kiffartornertik ilinniagarisinnaasamik pitsaanersarigaat. — 1 Korintumiut 9:16.
5 Suli angajoqqaanni najugaqaruit imaluunniit suli angajoqqaavit oqartussaaffigippatit, soorunami pilersaarutitit pillugit angajoqqaatit oqaloqatigisariaqarpatit. Paasitikkit qinunikkut pilersaarutit ilumoorullugu eqqarsaatigeqqissaarsimagit. Siunnersuutissaat tusaakkit. Angajoqqaatit ikiortigalugit pilersaarusiorit atuarfimmi pisassannut piffissaqartitsisumik imaluunniit silatusaarlutit iliuuseqarnikkut imminut pisariaqartitannik isumagisinnaaninnik takutitsisumik. Tulliani nakkutilliisoq angalasartoq ilagiinnut tikippat pilersaarutitit pillugit oqaloqatigisinnaavat. — Ussatit 15:22.
6 Pioneerinngorniaruit qaammatit arfinillit kuisimasooreertariaqarputit maligassiuilluartariaqarlutillu. Qularnanngilaq immikkut suliniuteqarnermi imaluunniit atuanngiffeqarninni ikiorti-pioneeriuneq misilereersimassagit, maannali qaammatini arlalinni ingerlatiinnarlugu ikiorti-pioneeriuneq misilissinnaavat. Kiffartorninni oqimaaqatigiissaarilluarsinnaaleruit, pioneeritut kiffartornissat qinnutigisinnaalissavat, qaammammut nalunaaquttap-akunneri 70-it anguniagaralugit. Illit atukkannut naleqquttumik sapaatip-akunneranut pilersaarusiorninni pioneerioreersumit ikioqqugit. Allanngorartumik kiffartornissaq piareersaraanni nalunaaquttap-akunnerisa angunissaat ajornannginnerussaaq.
7 Ullumikkut Jehovap peqatigiissortaani suliassat pissanganartut arlallit inuusuttunut piareersimasut pioneeritut kiffartornissamut aallarniutaasinnaapput. Inuusuttutut inuunermik nuannersumik siunertalimmillu qinerleruit, Jehovamut qujamasunnerit takutikkumallugu allanut ataavartumik iluaqutaajutigalutit, taava pioneeritut kiffartorneq ilinnut naleqquttuuvoq.