Pioneeritut kiffartorneq — soraarnertut!
1 Utoqqalinersiuteqartuuit imaluunniit suliunnaarnersiuteqartuuit? Imaluunniit ungasinngitsukkut soraarninngussavit? Nalinginnaasumik peqqissuuit? Immaqa taava pioneeritut kiffartornissat ilinnut piviusunngorsinnaavoq. Utoqqalinersiuteqartutut suliunnaarneriuteqartutulluunniit pioneeritut kiffartornissannut immikkut illuinnartumik periarfissaqalerputit, ilagiinnut angalaarfissamiittunullu iluaqutaasussamik.
2 Ukiorpassuarni ilagiit avataani suliffeqarsimanerpit qularnanngitsumik ulluinnarni inuunerit ulapinnartuutissimassavaa. Taamaakkunnaarsimavorli. Taarsiullugu ulluinnarni inuunerit sumik immersorusuppiuk? Immaqa aatsaat siullermeerlutit maannakkut inuunerit sumut atussanerlugu nammineq aalajangersinnaalerpat? „Kiffaanngissuseqaleriataarnerpit“ ilaa qanoq annertutigisoq Jehovamut tunniunniarpiuk? (Uss. 3:9, 10) Sapaatip-akunneranut nalunaaquttap akunneri 18-it pioneeritut kiffartornermut atortariaqarput, tamatuma naligaa nalinginnaasumik suliffiup sivisussusiata affaata missaa. Ilaa angujuminarunarpoq? Ilanngullugulu suliassat pingaarnerpaartaat qiimmaallannarnerpaartaallu ulapputigilissavat. — Mat. 24:14.
3 Pioneeriunissamut aningaasaqarniarneq aporfiusinnaavoq. Utoqqalinersiutilittulli imaluunniit suliunnaarnersiutillittut ajornartorsiut tamanna qaangerneqassaaq. Pioneeriulluni kiffartorneq ulapputiginartarpoq. Inuuneq imaqarnerulersittarpaa siunertaqalersillugulu, atuinerulersitsinerli ajorpoq aningaasaqarniarnerlu artornarnerulersinnagu. Taamaattumik pioneeritut kiffartorneq aningaasatigut napasinnaanermut ikiuutaavoq. — Epr. 13:5, 6.
4 Soraarninngorninni inuunermi ilisimassuseqarneq anersaakkullu inersimalluassuseq angusimassavatit oqaluussiffinni inunnik attaveqarluarnissannut pitsaanerusumik periarfissiisoq. Saniatigullu pioneeriuguit piginnaanitit tamakku inuit eqqortuliorusuttut iluaqutissaannik suli annerusumik atorsinnaavatit. Aammattaaq ilagiinniittunut allanut qiimmassaataasorujussuussaatit oqaluussillutit angalaaqatigisartakkatit ilinniartillugit pikkorissarlugillu, aammalu inuuninni misigisannik ilisimasannillu aveqatigisinnaavatit. — Uss. 16:31.
5 Allanik ikiuineq ulapputigigaanni aamma imminut ikiorsiineruvoq. (ap. sul. 20:35) Suliniuteqarluni inuuneq unamminiarnartunik nuannersorpassuarnillu imaqartoq, inuit pissanganartut qatanngutillu angutit arnallu katerisimaaqatiginerat tamarmik peqqissutsimut ajunngitsumik sunniuteqartarput. Qatanngutip angutip 85-inik ukiullip pioneeriujunnaarniarluni nakorsaminut saaffiginnissimavoq. Nakorsaata taamaalioqqunngivissimavaa. Maannakkut qatanngut taanna 90-inik ukioqarpoq sulilu pioneeriulluni.
6 Pioneeritut kiffartorneq Jehovamut qanittumik attaveqalernermik immikkut ittumik periarfissiisarpoq. Utoqqalinersiuteqartuuit imaluunniit suliunnaarnersiuteqarpit? Qanittukkut taamaalissavit? Taamaappat pioneeritut kiffartorneq ilinnut piviusunngorsinnaava? — 2 Kor. 2:12; Epr. 6:10.