Maannakkut pioneerinngorsinnaavit?
1 1999-imi ukiumut allassimaffiup eqqaasippaatigut Jehovap ’ulluani annaassivimmi’ inuusugut. (2 Kor. 6:2) Ullorli taanna naalivippoq, tamatumali kingorna ’ulloq eqqartuutiffissaq’ aallartissalluni. (2 Pît. 2:9) Jehova annannissaq anguneqaqqullugu suli periarfissiigallartillugu, nutaarsiassamik nuannersumik pigiliussisut amerliartuinnartut takullugit nuanneqaaq.
2 Jehovap kiffai piffissaatillugu tusarusuttut nassaariumallugit nukitik tamaasa atortarpaat. Oqaluussisartut amerlasuut taamaaliorniarlutik pioneeritut kiffartulersimapput. Illit taamaaliornissannut periarfissaqarpit? Sooq taamatut aperivugut?
3 Pingaartitsinermut ersiutaavoq: Soorlu Guutip Naalagaaffianut Kiffartorneq-mi januaari 1999-imoortumi nalunaarutigineqartoq, pioneerinut ikiorti-pioneerinullu nalunaaquttap-akunneranik piumasaqaatit ikilisinneqarput. Piumasaqaatit nutaat naapertorlugit pioneerit qaammammut nalunaaquttap-akunnerini 70-ini oqaluussissapput, tassa ukiup kiffartuussiffiup ingerlanerani nalunaaquttap-akunnerini 840-ni, ikiorti-pioneerillu qaammammut nalunaaquttap-akunnerini 50-ini. Ilaasa ikilisaaneq tamanna pillugu pingaartitsinertik imatut oqaasertaqarlutik:
„Isumassuinersi asanninnersilu pillugit qujavunga. Tamatuma nalunnaaquttap-akunnerinik pilersaarusitta malinnissaat ajornannginnerulersippaa.“
„Tamannarpiaavoq pioneerinngorniarlunga nalunaarnissannut pisariaqartitara.“
„Ukiorpassuit ikiorti-pioneeritut kiffartornissara kissaatigisarsimagaluarpara, kisianni sapilertarsimavunga. Maannakkut sapiillunga misiliivunga, Jehovallu ilumut pilluaqqusimavaanga. Qujamasuffigeqaara, ikiorti-pioneerioqqikkumanissaralu qularnanngilaq.“
„Qularnanngitsumik suli amerlanerungaartut maanna pioneeritut kiffartulersinnaassapput, Jehovamullu annertunerusumik kiffartornermi pilluaqqussutinut pissarseqataallutik.“
4 Guutip ’ulluata annaassiviup’ sakkortunerpaaffissaa qanilliartuaartillugu nalunanngilaq Jehovap innuttami naggataarutaasumik unnersiutiginninnerata tusarsaasarnissaa kissaatigigaa. Tusarliussaq siammariartuinnarpoq ersarissiartuinnarlunilu (1) oqaluussisartut amerliartuinnarmata aamma (2) Guutip naalagaaffia pillugu oqaluussineq tamarmik immikkut annertunerusumik peqataaffiginiarmassuk. Iluatsittarpoq Jehovap ’naajartortitsisup’ annassummik ilassinnittut kajumillutik suleqataanerat pilluaqqummagu. — 1 Kor. 3:6, 7; Tus. 110:3.
5 Asuliinnaq pisareqinasiuk: Paulusip Jehovap ’ullua annaassivik’ eqqarsaatigalugu kristumioqatini ima kajumassaarpai: ’Suleqataasutut aamma oqaaqqissaarpassi [Jehovap] saammaannera asuliinnaq pisareqqunasiuk.’ ’Saammannera asuliinnaq pisarissanngilarput’ periarfissat tamaasa allat annannissaannut ’ullortut nalliuttutut nuannersutut’ isigisarutsigik. (2 Kor. 6:1, 2) Ullutsinni Paulusip oqaasii aatsaat taama pingaaruteqartigaat. Kristumiut Jehovamut ilumoortumik asannittut kiffartuutigeqqusaanut tamakkiisumik ulappussuteqarnertik immikkut pisinnaatitaaffittut pingaartutut isigissavaat. Maannakkut pioneerinngorlutit annertunerusumik oqaluusseqataasinnaavit?
6 Anguniagaavoq ingasaassinngitsoq: Danmarkimi ukiumi 2000-imi pioneerit 1000-nngornissaat anguniagaraarput. Isumaqarpugut ingasaassinerunngitsoq anguneqarsinnaasorlu. Sooq taama isumaqarpugut? 1997-imi apriilimi qatanngutit angutit arnallu 1638-t ikiorti-pioneeriupput, 1998-milu apriilimi 1319-t ikiorti-pioneeriullutik. Amerlanersaasa nalunaaquttap-akunneri 60-it angusimavaat — tassa pioneerinut piumasaqaat nutaaq nalunaaquttap-akunnerinik 10-nik inorlugu. Ukioq manna aprilimi 3010 ikiorti-pioneeriupput, tamatumalu takutippaa annertunerusumik kiffartornissamut soqutiginnittoqaqisoq. Sulimi qaammatit 17-upput anguniakkatta angunissaanut. Immaqa maannakkorpiaq pioneeriunissamut periarfissaqanngikkaluarluni piffissaavoq atugarisat allanngortinnerisigut periarfissaqalernissamut. — Fil. 3:5.
7 Pilersaarusiornissaq pisariaqarpoq: Oqaluussinermut nalunaaquttap-akunnerisa 70-it atortarnissaat inornartutut suli isigaajuk? Immaqa ikiuutaassaaq angusassat sapaatip-akunneranut nalunaaquttap-akunneri 17-ikkarlugit agguarukkit. Quppernermi tulliuttumi najoqqutassiat iluaqutigalugit ilinnut naleqquttunngorlugu pilersaarusiorlutit misileriaruk. Pilersaarusiunnginninni pioneerit misilittagallit siunersiorsinnaavutit paasiniarlugulu qanoq ilillutik pioneeritut kiffartornerminnik allanillu Bibilimut tunngasunik isumagisaminnik oqimaaqatigiisaarisarnersut. Nakkutilliisoq angalasartoq aperiuk pioneerit allat sapaatip-akunneri tamaasa qanoq pilersaarusiortarsimanersut. Jehovap pioneerinngornissannut pilersaarusiatit pilluaqqujumaarai tatigilluinnaruk. — Uss. 16:3.
8 Ilaqulariittut sulissutigisiuk: Isumaliutigisimaviuk pioneeritut kiffartorneq ilaqutariittut peqatigiillusi suleqatigiissutigisinnaanerlugu? Ilaqutariillusi isumalioqatigiigitsi, oqaloqatigiillusilu pilersaarussioqqisaarnikkut suleqatigiilluarnikkullu ataaseq marlulluunniit pioneeriusinnaanersut. Soorunalimi ilaannut isumaliutigeqqissaareerlugu paasinarsissaaq maannakkut pioneerinngornissamut periarfissaqaratik. Taamaappat siunissami pioneeritut kiffartornissaq anguniagassanngortissiuk. Kisianni pioneerinngornissat aallartinniarlugu pilersaarusioreerit. Immaqa ukiup ingerlanerani arlaleriarlutit ikiorti-pioneeriusinnaavutit pioneerinngornissat siunertatut anguniarlugu.
9 Maanna Danmarkimi 600-t sinnerlugit pioneeritut kiffartulereersut assigiinngitsunik atugaqartarput. Tamarmik peqqinnerpaajunngillat, amerlanerit aningaasatigut ilaqutariittullu isumagisassaqarput. Utoqqaapput, inuusuttuupput, qatanngutaapput arnat angutillu, ataataallutillu anaanaapput. Qatanngutit angutit amerlasuut ilagiinni akisussaaffeqarlutillu isumagisassaqartarput. Tamarmilli pioneeritut kiffartorniarlutik ’ullut pisinnaaffiusut asiutinnaveersaarpaat’, tamannalu amerlanertigut pisariunngitsumik aammali naammaginartumik inooriaaseqalernermik nassataqarsimavoq. — Kul. 4:5.
10 Pisariunngitsumik inuuniarsinnaavit? Pisariunngitsumik inuuneqalerneq matuersaataasinnaavoq pioneeritut kiffartornissannut ’matumik’ ilinnut ammassisoq. Inuunerit assersuunneqarsinnaava illorujussarmut atorneqanngitsunik inilimmut, atorfissaqanngitsunik piffisaajaataaginnartunik suliaqutaaginnartunik, aningaasarpassuarnillu nalilinnik paarisariaqarnartunik pequtilimmut? Pigissaartuunani inooriaaseqarneq sungiussinnaagaanni pioneerinngornermik kinguneqarsinnaavoq. Sivikinnerusumik sulisarsinnaavit? Suliniutinut pingaannginnerusunut piffissaq atortakkat pisiarisinnaaviuk imaluunniit sunngiffinnut atugassat piffissaq aalajangeraangakku naligiissaarinerusinnaavit?
11 Biibilimi Timûtiusimut agdlagkat sujugdlît 6:8-imi ’nerisassaqarlutali atisassaqarutta naammageqqullugu’ kajumissaarneqarpugut. Annikitsunik naammaginninneq pingaaruteqarpoq anersaakkut soqutigisat inuunermi salliullugit Jehovalu kiffartortillugu nukivut taamasa atorutsigik. (Matîuse 6:22, 33) ’Atuakkami ukiumoortumi’ 1998-imoortumi qupperneq 103-104-mi Japan pillugu nalunaarusiami nunami tassani pioneeritut anersaaqarluarneq assigiinngitsunik pissuteqartinneqarpoq. Ilaatigut ima allassimavoq: „Nalinginnaasumik Japanimi angerlarsimaffiit pigisakitsuupput paarinissaallu piffissajaataanatik, inooriaaserlu amerlanertigut pisariitsuulluni.“ Tassaannginnerpa Timûtiusimut agdlagkat sujugdlît 6:8-imi allassimasup pingaartortaa?
12 ’Pisariillisaaneq’ takorlooruminaassinnaavoq. Ullutsinni amerlasuunik isumagisassarpassuaqartarpoq, inuunerulli matuma anguniagai tassaaginnanngillat ilagisartakkanit ajoqutaanngitsumik tatineqarneq. Tassaappulli assortuisorsuatta isumassarsiarititai. (1 Juá. 5:19) Taassuma peqqusersioriaasiisa nutannginnersaasa ilaat tassaavoq inuit misigilersillugit arlaannik pinngitsuugaqarlutik. Eva salloqittarneqarluni uppertinneqarpoq erliguunneqarsimalluni, naak paratiisimi inuugaluarluni. Uagut aamma salloqittartippugut? Imaluunniit innunermut pisariunngitsunik piumasaqartarpugut?
13 Nunarsuarmi sumiluunniit Guutip kiffai ilungersoraluttuinnarlutik nutaarsiassaq nuannersoq Jehovap ’ullua annaassiviup’ naannginnerani oqaluussissutigaat. Nersugassaavoq ukioq kingulleq qaammatit tamaasa agguaqatigiissillugu 700.000-t pioneeritut assigisaatullu kiffartorsimammata. Illit inooriaatsit allanngortissinnaaviuk taakkua maligassiaat malinniarlugu? Kajumissaarumavatsigit periarfissatit qinunikkut isumaliutigeqqissaaqqullugit, apeqqut una akigukku: „Maannakkut pioneerinngorsinnaavit?“
[Qupp. 3-mi issuagaq]
ANGUNIAGAQ: Ukiumi 2000-imi pioneerit 1000-t
[Qupp. 5-mi ungalusaq]
Pioneritut kiffartornermut pilersaarutinut assersuutissat
Piumasaqaat: Sapaatip akunneranut nalunaaquttap-akunneri 17-it
Ulluinnaq sapaatillu akunnerata naanera
Ulloq Nalunaaquttap-akunneri
Tallimanngorneq 8
Arfininngorneq 6
Sapaat 3
Nalunaaquttap-akunneri katillugit: 17
Unnuk, ulluinnaq sapaatillu akunnerata naanera
Ulloq Nalunaaquttap-akunneri
Ataasinngorneq 2
Pingasunngorneq 7
Arfininngorneq 5
Sapaat 3
Nalunaaquttap-akunneri katillugit: 17
Ulluinnaat marluk sapaatillu akunnerata naanera
Ulloq Nalunaaquttap-akunneri
Ataasinngorneq 6
Pingasunngorneq 6
Arfininngorneq 3
Sapaat 2
Nalunaaquttap-akunneri katillugit: 17
Unnuit marluk spaatillu akunnerata naanera
Ulloq Nalunaaquttap-akunneri
Ataasinngorneq 3
Pingasunngorneq 3
Arfininngorneq 7
Sapaat 4
Nalunaaquttap-akunneri katillugit: 17
Pioneritut kiffartornissamut nammineq pilersaarusiorit
Ulloq Nalunaaquttap-akunneri
Ataasinngorneq
Marlunngorneq
Pingasunngorneq
Sisamanngorneq
Tallimanngorneq
Arfininngorneq
Sapaat
Nalunaaquttap-akunneri katillugit: 17