Ilaqutariit qanoq ilillutik suleqatigiissinnaasut — Biibilimik atuaqqissaaqatigiinnermi
1 Sallusuissutip ilaqutariittut inuuneq siunertaqalersittarpaa imaqalersittarlugulu, kisianni ilaqutariit anersaakkut nukittuunngorniarunik piffissaq nukippassuillu atortariaqarpaat. Taamaattumik ilaqutariit tamatumunnga qanimut suleqatigiinnissaat pingaaruteqarpoq. Allaaserisaq manna pingasunit siulliuvoq ilaqutariittut suleqatigiilluni atuaqqissaaqatigiittarnermik ileqquliussilluarnissaq pillugu.
2 Biibilip ullut tamaasa atuartarneratigut: Ussatit 24:5-imi allaqqasoqarpoq: „Paasisimasaqarluartup pissaanini alliartortittarpaa.“ Ilisimassut Guutip oqaasianik aalajangersimasumik atuartarnikkut pissarsiarisartagaq Satanip saassussisarnerisa akiorsinnaanissaanut pisariaqartumik ilukkut nukissaqalersitsisarpoq. (Tus. 1:1, 2) Ilaqutariillusi ullut tamaasa Biibilimik atuartarpisi? Teokratiimik Atuarfimmi atugassat saniatigut sapaatit-akunneri tamaasa ukioq naallugu Biibilimik atuagassatut ilanngussaqarpoq. Pilersaarut tamanna malinniarlugu ilaqutariit ullut tamaasa 10 minutsit missaat taamaallaat atortariaqarpaat. Piffissamik pitsaasumik qinersigit, immaqa ullaakkorsiornermi, unnukkut nerereernerup kingorna imaluunniit innannginnermi, Biibilip atuartarnissaanut ’ullormullu allassimaffiup’ oqaloqatigiissutigisarnissaanut. Tamanna ulluinnarni ilaqutariittut inunnermi ileqquliussiuk.
3 Sapaatit-akunneri tamaasa atuaqqissaaqatigiinnikkut: Ilaqutariittut atuaqqissaaqatigiinneq sapaatip-akunnerata pingaarnersarissavaa. Ataasiakkaat tamarmik atuaqqissaaqatigiinnermi peqataalluarniartariaqarput. Ilaqutariinni qullersaasup sammisassanut tunngatillugu ilaquttami pisariaqartitaat naapertorlugit toqqaasassaaq taavalu aalajangissallugu atuaqqissaaqatigiinneq qaqugu qanorlu annertutigisumik ingerlanneqassanersoq. Sapaatip-akunnerani pilersaarutissinni ilaqutariillusi atuaqqissaaqatigiittarnersi salliutittarsiuk. Pingaannginnerusunit akornusersortinnaveeritsi. — Fil. 1:10, 11.
4 Ataataasoq namminersortoq atorfimminut tunngatillugu sianerfigitikulasarsimavoq, ilaqutariittulli atuaqqissaaqatigiikkaangamik oqarasuaat atassutaartarsimavaa. Angerlarsimaffiannut saaffiginnittoqaraangat peqataarusunnersut imaluunniit atuaqqissaaqatigiinnerup kingornagut utaqqisinnaanersut aperineqartarput. Ataataasup aalajangiussimavaa ilaqutariittut atuaqqissaarnerminni akornuserneqassanngitsut. Meeraasa tamanna killissutigisimavaat, ilaqutariillu aningaasaqarniarnerup tungaatigut sapersinneqarsimanngillat.
5 Nuannaarnaqaaq ineriartornarlunilu ilaqutariinnut ilaasortaasut anersaamut tunngasutigut ikioqatigiikkaangata. Aalajaalluta ilaqutariittut Biibilimik atuaqqissaaqatigiittarutta, Jehovamit pilluaqquneqangaassaagut. — Tus. 1:3.