Atuagaq Inuk inuit inuusimasut pingaarnerpaartaat neqeroorutigiuk
1 Juánase 1:18-imi allaqqavoq: ’Guutimik takunnittoqanngisaannarpoq; ernituaq Ataatap saaniittoq taassuminnga nalujunnaarsitsisuuvoq.’ Taamaattumik pissusissamisoorpoq Jesus inuk inuit inuusimasut pingaarnerpaartaannik taaneqarsimammat. Decembarip qaammataani atuagaq Inuk inuit inuusimasut pingaarnerpaartaat neqeroorutaassaaq, qularutissaanngilarlu atuagaq tamanna taanna Ataataalu, Jehova, pillugit ilinniarnermi ikiuutaalluassasoq. — Juá. 17:3.
2 Atuagaq ’Inuk’ arlaleriarluta oqaluussinitsinni atortarsimavarput, saqqummiusseriaatsimillu atorluarsimasannik misileereersimaguit, kajumissaassavatsigit atortaqqullugu. Pissutsini tamani ingammik pingaaruteqarpoq eqqarsaatigissallugu oqaloqatigiinnerup aallartinnerani qanoq iliornissaq oqarnissarlu. Tulliuttut eqqumaffigisakkit:
3 Matup eqqaani eqqissisimasumik qasukkarsimasumillu nikorfanissaq pingaaruteqarpoq. Isumat eqqarsaatitillu pulaagassannut sammitikkit. Jehova qinnuigisaruk pulaakkallu attaveqatigiillualersinnaaqqullusi. (Neh. 2:4) Matu ammarpat, pulaagaq isaasigut toqqarlugu isigiuk inussiarnisaarfigalugulu ammaffigiuk. Aallarniilluni oqaaseqatigiit naatsuussapput paasiuminartuullutillu takivallaartuunatillu. Sukkavallaartumik oqalunnaveersaarit, kisianni saqqummiussinerit ingerlateqqitsinnagu tusarnaarluarit. — Jâk. 1:19.
4 Attaveqarlualersimaguit pingaaruteqarpoq pulaagaq oqaloqatigiinnermut peqataalersissallugu, assersuutigalugu aperisarneratigut. Apeqqutivit ersarissumik ersersissavaat akissutaanut tusarnaarluartutit. Tamakkua eqqumaffigilluarukkit amerlanerusunik oqaloqateqarsinnaassaatit oqaluussinerillu pissanganarnerulerluni.
5 Saqqummiusseriaaseq una atorlugu amerlasuut angusaqarluarsimapput: „Oqaluttuarisaanermi inoqartuarsimavoq inuit allat inuuneranik sunniisartunik. Tamannalu apeqqummik soqutiginartumik pilersitsivoq: Inunnit inuusimasunit kina pingaarnerpaava? Illit qanoq isumaqarpit? Pulaakkap akissuteqarnissaanut piffissaqartiguk. Akissutaa oqaaseqarfigisinnaavat. Taava ingerlaqqissinnaavutit oqarlutit: „Takutikkusuppara oqaluttuarisaanermik ilisimatooq ilisimaneqarluartoq qanoq oqarsimasoq: [Atuakkap aallarniutaani immikkoortoq 2 atuaruk.] Tupigusuutigaajuk Jesus pineqarmat? [Pulaagaq akissuteqarli.] Naak nunami kristumiuunerarfiusumi inuugaluarluta, Jesusip inuttut qanoq ittuusimaneranik qanoq annertutigisumik ilisimasaqarpugut? Ilinniartitsinera sumik siunertaqarpa? Qanoq inuusimava, allanullu qanoq ittuusimava?“ Pulaagaq oqaaseqartiguk, atuagarlu neqeroorutigalugu.
6 Atuagaq ’Inuk’ nuannaarluta neqeroorutigisarutsigu, Jesus Kristusip maligassiaatigut oqaluussineratigullu amerlanerusut Jehova pillugu ’nalujunnarsinneqassapput’.