Inuit allat kajumissaakkit inuk inuusimasoq pingaarnerpaaq malissinnaaqqullugu
1 Peterip allagaani siullerni 2:21-mi allaqqavoq: ’Tamatumunngami qaaqqusimavusi, Kristusissaaq anniarmimmat ilissi pillusi maligassaqartillusi, tumini atuaqqullusigik.’ Kristusip tumai maannakkut atuaraanni isumaqaannanngilaq maannakkuinnaq pilluarluni inuusinnaalluni, kisiannili aamma nassatarivaa nunami paratiisimi naassaanngitsumik inuulernissaq. Tamanna eqqarsaatigitillugu nuannaarutigissavarput decembarimi Inuk inuit inuusimasut pingaarnerpaartaat neqeroorutigineqassammat. Atuakkap taassuma inuit periarfissippai Jesus ilisariniassallugu, eqqortumillu isumaqarfigigunikku, misigisinnaapput ’pinngitsaalineqarlutik’ tumiisa atuaqqissaarnissaanut. — Takuuk 2 Korintumiut 5:14.
2 Immikkoortuni tulliuttuni atorsinnaasannik siunnersuuteqarpoq, eqqaamajulli uteqattaagassatut alanngaagassatullu suliaanngimmata. Naamik, illit oqaluusseriaatsit naapertorlugu atorniassavatit, angalaarfigisartakkanni illit atukkanni, aammalu inunnut pulaartakkannut naapertuuttunngorlugit. Siunnersuutaannapput. Pulaaraangavit aallarneeraangavit illit nammineerlutit iluarisannik, aammalu kinguneqarluartartumik, nammineq atuinnartassavatit. Eqqaamajuk inunnut oqalugiarfiginnerusunnginnatta, kisianni oqaloqatiginnikkusukkatta. Taamaattumik eqqaamajuk pulaakkat tusarnaartassagakku, oqaloqatigiinnermullu ilaatinniarsarisassagakku.
3 Inussiarnersumik ilisaritereeruit oqarsinnaavutit:
◼ „Jesusip nunarsuarmiikkallarami qanoq ittuusimaneranik inuppassuit eqqarsaatiginnittarput. Illit inunnit allanit sukkut immikkooruteqarsoraajuk? [Pulaakkat akili.] Uuma atuakkap, Inuk inuit inuusimasut pingaarnerpaartaat, inuunerani, kiffartorneranilu pingaarnerusut sammivai, atuartorlu paasitissinnaavaa inuttut qanoq ittuusimaneranik. Amerlasuut atuagaq atuareerlugulu misigisarsimapput soorlu namminneq ilagisimallugu, anniarnerani peqatigisimallugu aammalu kiffartorsimanera qanimut malittarisimallugu.“ Atuakkap assiliartaa siulleq takutiguk, atuakkap qulequtaata allassimaffigisaa. Kingornatigut siulequtaa takutiguk, qulequtalimmilu „Taanna pillugu ilinniarneq iluaqutigiuk“-mi immikkoortup aappaa atuaruk. Pulaakkap soqutigippagu atuagaq neqeroorutigiuk.
4 Pulaakkap atuagaq pisimappagu, pingaaruteqarpoq aggeqqipallannissaq, pitsaanerussaaq sapaatip-akunnera naatinnagu. Pulaaqqinnermi ima oqarsinnaavutit:
◼ „Sapaatip-akunnerani kingullermi maaniikkama oqaloqatigiissutigivarput Jesusip inuttut qanoq ittuusimanera. Nuannaarutigisimavara atuagaq Inuk inuit inuusimasut pingaarnerpaartaat illit pisimagakku. Immaqa nammineerlutit eqqarsaatigikannersimassavat Jesusip ajoqersueriaasia aammalu qanoq inuttut pissuseqarsimanersoq?“ Pulaakkat akili. Kapitali 113 takutiguk, oqaloqatigiissutigiullu Jesusip maniguullaqqinnermut maligassiuisimanera. Aammattaaq atuaruk Filipimiut agdlagkat 2:8, takutinniarlugu Paulusip Jesusip maniguussimanera qanoq isigineraa. Tamatuma kingornatigut nassuiaassinnaavat Biibilimik atuaqqissaarnikkut annertunerusumik ilinniagaqarsinnaasoq. Isumaqatigiissuteqarfigiuk tulliani qaqugu takkussinnaanerlutit.
5 Aamma allatut periaaseqarlutit atuagaq neqeroorutigisinnaavat:
◼ „Jesus eqqartorneqartillugu naalungiarsuttut eqqarsaatigisarpiuk? Imaluunniit angutitut anniartutut toqulersutut? [Pulaakkat akili.] Amerlasuut taamaallaat inunngorsimanera toqusimaneralu eqqarsaatigisarpaat. Inuugallarami suliarisimasai qaqutigoorluinnartut iliuuserisimasaalu tusarneqarpiarneq ajorput. Kisianni naammassisimasaanit inuk kinaluunniit maani nunarsuarmi inuusimasoq attugaavoq. Taamaattumik taanna pillugu sapinngisamik annertuumik ilinniarnissarput pingaaruteqarpoq. Uani Juánase 17:3-mi tamatuma pingaartutut eqqaaneqarnera malugiuk.“ Tamatuma kingornatigut atuakkap siulequtaani quppernermi siullermi immikkoortut sisamaat atuaruk. Pulaakkat nassuiaaguk atuagaq pisinnaagaa nammineerlunilu atuarsinnaagaa.
6 Pulaaqqaarnermi siullermi siunnersuutigineqartut atorsimagukkit pulaaqqinnermi toqqaannartumik makkua atorsinnaavatit:
◼ „Kingullermik maaniikkama eqqartorsimavarput Jesus pillugu ilisarsinissaq qanoq pingaaruteqartigisoq. Juánase 17:3-mi eqqaaneqarpoq tamanna ’tassaasoq inuuneq naassaanngitsoq’. Qanoq ililluta ilisarsineq taama ittoq angusinnaavarput?“ [Pulaakkat akili.] Tamatuma kingorna Biibilimik atuaqqissaarnissaanik neqeroorfigiuk, nassuiaallugulu qanoq iluaqutigisinnaaneraa.
7 Periaaseq sunaluunniit atorniarlugu toqqarsimagukku, inussiarnisaarlutit soqutiginnillutillu takutitsiguit, inuit naapertuilluartumik nuannarisaqartut uummataat angusinnaavatit kajumissaarlugillu Jesup tumaanik atuaqqissaarinissaannik. Immaqa kissaatigisaraluattut suliniutitit kinguneqarluarneq ajoraluartut, oqaluussinikkut oqaluussinermik periaaserissaarnikkut kimittuumik tassaasinnaavutit ’isiginnaagassiaq inngilinut inunnullu’ — Jehovamut ataqqinaataasumik. — 1 Korintumiut 4:9.