Ullut tamaasa Jehova pillugu oqaluttarit
1 Nuannarisavut pillugit oqalunnissarput tamatta nuannarisarparput, ’uummatimmi ulikkaarutaanit qaneq oqaluttarmat’. (Lúk. 6:45b) Sunik uummammioqarpit? Tussiaasiortoq ima allappoq: „Tusarliutissavara annaassinerit, nersortuinnassavakkillu“. (Tus. 35:28) Jehovamut annertuumik pingaartitsivoq sutigullu tamatigut Guuti pillugu oqalunnissani unnersiutiginninnissanilu immikkut pisinnaatitaaffittut isigaa. Tussiaasiortup Jehova ilisarisimavaa taamaattumillu amerlasoorpassuarnik nuannaarutissaqarpoq. (Tus. 35:9) Tussiaasiortup maligassiaa pitsaasoq qanoq ililluta maleruarsinnaavarput?
2 Angerlarsimaffimmi Jehova pillugu oqaluttaritsi: Ulluinnarni Jehova ilaqutariit iluanni oqaloqatigiissutigisariaqarpoq. Angajoqqaat Jehovamut asannittut assigiinngitsunik suliaqaatigalutik taassuma oqaluuserinissaa pissusissamisut isigissavaat. (5 Mos. 6:5-7) Taamaaliorunik qitornaasut takusinnaassavaat ataatartik anaanartillu uppernertik malillugu inuusut aammalu Guutip inatsisaanik pingaartitsisuusut. Qitornaasullu ilaqutariittut Biibilimik atuaqqissaartarnertik isigissavaat angajoqqaami ilumoortumik Guutimut tunniussimanerannut ersiutaasutut. — 2 Pît. 3:11.
3 Qatanngutit ilagitillugit Jehova pillugu oqaluttarit: Sapaatip akunnerani teokratii pillugu suliaqartarnitta amerlasuunik periarfissippaatigut isumatta uummatittalu anersaakkut nerisassanik immernissaannut. Ajunngitsut pillugit oqaasissaaleqinngisaannarpugut. (Lúk. 6:45a) Nammineerlutit atuaqqissaarninni imaluunniit sapaatip- akunneranoortumut Biibilimik atuagassap atuarnerani soqutiginartumik siumugaqarpit? Qatanngutit tamanna pillugu oqaluttuutikkit, taamaalillutit Jehovamut asanninnermik ineriartortitsinissaannik ikiorlugit. — Tus. 35:18, Epr. 10:24.
4 Jehova pillugu allanut oqaluttarit: Ulluinnarni amerlasoorpassuarnut attaveqartarpugut — suliffimmi, atuarfimmi aammalu ilaquttat uppinngitsut ilagigaangatsigik — inuunitsinni malunnarluinnartariaqarpoq Jehova pillugu nalunaajaanissarput pingaarnerpaajusoq. Silarsuup isummamik ersersitsisaasia inersimarpalunngitsoq peqqarniitsorlu issuaannarnagu oqalunnitta Guuti nersortariaqarpaa. Ullut tamaasa, aap, periarfissat tamaasa, allat nutaarsiassaq nuannersoq pillugu oqaloqatigisariaqarpavut oqaluussinissamik peqqussut malillugu — ap. sul. 5:42; Kul. 4:6.
5 Jehovap pallorfiginnittaatut ilumoortutut periarfissarsiortarisa Guuterput asseqanngitsoq Jehova pillugu oqalunnissatsinnut. — Tus. 106:47.