Ilaguutiinnarneq qanoq qisuariarfigisarpiuk?
1 Ilaguutiinnarneq tassaavoq sorusoqannginneq, soqutiginninnermik peqataarusunnermilluunniit amigaateqarneq. Tamanna oqaluussiffigisartakkatsinni pissutsit nalinginnaanerpaat ajornakusoornerpaallu ilagaat. Qanoq qisuariarfigisarpiuk? Kiffartuussilluarnerit annikillisissimavaa? Soqutigisaqannginneq naammattoortakkat qanoq ilillutit qaangersinnaaviuk inuillu Guutip naalagaaffia pillugu tusagassamik tusarlerlugit?
2 Siullermik paasisariaqarparput sooq oqaluussisarfitsinni inuit ilaguutiinnarnersut. Politikkikkut upperisarsiornikkulluunniit siulersuisunik pakatsissutiginninnermik pissuteqarpa? Ajornartorsiutimik aaqqiissutissaannik takunnissinnaannginnerat pissutaava? Ajunnginnerusumik neriorsuisunik qulartuuppat? Tigussaasumik ingerlaannaq iluaqutigisinnaallugu takusinnaanngikkaangamikku anersaakkut ittunik sammisaqarusunneq ajorpat?
3 Guutip naalagaaffia pillugu neriuut saqqummiuguk: Ajornartorsiuteqanngilaq Guutip naalagaaffianit aaqqinneqarsinnaanngitsumik. Taamaattumik periarfissaqarnerit tamaasa Guutip naalagaaffiata neriorsuutai allassimaffinnut pingaarnernut innersuussilluta eqqartortariaqarpavut, aamma Biibili quppersinnaanngikkaluaraangatsigu. (Epr. 4:12) Qanorli ililluta oqaloqatigiinnermi taama angusaqartigisinnaavugut?
4 Inuit paasisariaqarpaat sooq pulaartugut. Paasisariaqarpaat tullermut asannissuseqaratta inuiaqatigiillu isumakuluutigigatsigit pulaartugut. Eqqarsaatigilluarsimasamik aperisinnaavugut, soorlu imatut: „Qanoq ilillugu [illoqarfimmi najugarisassinni ajornartorsiut immikkut taajuk] aaqqinneqarsinnaasoraajuk?“ Periaaseq ataaseq sunniuteqanngippat alla misiliguk.
5 Aqqusinermi pisuut illoqarfigisaanni Guutip naalagaaffia pillugu tusagassamik tusarnaarusunngiffiusumi oqaluussisartut aallarniummik soqutiginnilersitsisumik nassaarniarsimapput. Aappariit atuagaq ’Ilisarsineq’ atorlugu aallarniut imaattoq misilissimavaat: „Isumaqarpit ullutsinni silarsuarmi iluatsitsissagaanni ilinniagaqarluarsimaneq pingaartuusoq? Aamma illit isumaqarpit ilinniagaqarnermut tamatigoortumut Biibilimik ilisimasaqarneq ilaasoq?“ Ualip ataatsip ingerlanerani atuakkat pingasut agguaappaat. Arnaq ataaseq atuakkamik pisoq kingusinnerusukkut oqarpoq atuagaq naallugu atuarsimallugu. Biibilimik atuaqqissaaqatineqarusuppoq.
6 Ilaguutiinnarneq naammattooraangakku periaatsit assigiinngitsut misilittartakkit, eqqarsalersitsisunik aperisarit Guutillu oqaasiata sunniuteqarsinnaanera atortaruk. Taamaalillutit allat Guutip naalagaaffia pillugu neriuummik tupinnangaartumik ilassinninnissaannik ikiorsinnaavatit.