Sooq taama iliorpat?
1 Messias pillugu siulittuuteqarpoq ’Guutip illuanik ilungersuutiginninnerata nungutilerumaaraa’. (Tus. 69:10) Jesusip Jehovamik pallorfiginninnermik ilumoortumik ilungersuutiginninnerata kiffartornissamik sallinngortitsisippaa. (Lúk. 4:43; Juá. 18:37) Jehovap nalunaajaasuisa ullumikkuttaaq taamatut sallusuissummik oqaluussissutiginninnerminni ilungersuutiginnittuupput. Ukioq oqaluussiffiusoq kingulleq qaammammut agguaqatigiisillugu 645.509-t nunarsuaq tamakkerlugu pioneerisut kiffartornermut tamatumaluunniit assigisaanut peqataasimapput. Tunniulluinnarsimanerput eqqarsaatigalugu Jehovamut neriorsuuteqaratta tamatta qinunikkut eqqarsaatigisariaqarparput pissutsit atukkavut eqqarsaatigalugit ikiorti-pioneerisut imaluunniit naliginnaasumik pioneerisut kiffartorsinnaanersugut. — Tus. 110:3; Nal. oq. 12:1; Rûm. 12:1.
2 Silarsuarmi namminissarsiortumi timillu piinik pingaartitsivallaartumi inuuvugut, taamaattumillu inuit ilaat eqiasuingaarlutik aningaasarsiutiginagu imaluunniit ataqqinaataanngitsumik sulerusunnerat eqqumiigineqartarpoq. Soorliuna taama iliortut? Pioneerit ilisimavaat annaassiniarnertut ittumik sulinermut peqataallutik. Jehovamut asanningaarnertik tulliminnullu killinneqaatigalugit inuup inuuneranik annaassiniarnermut peqataanissaminnut sakkortuumik pisussaaffeqarlutik misigisimapput. (Rûm. 1:14-16; 1 Tim. 2:4; 4:16) Pioneerit aappariit ataatsimut katillugu pitsaasumik ima oqaatigivaat: „Sooq pioneeriusugut? Taamaattuunngikkutta Jehovamut nassuiarsinnaanerparput?“
3 Qatanngut arnaq pioneerisut aallartinnissaminik aalajangiussisimanini pillugu allappoq: „Uigalu pilersaarusiorpugut naammaannartumik inuuniarluta taamaalilluta ataatsip aningaasatigut isertitaanik inuuniarsinnaalerluta. Jehovallu pilluaqqungaarsimavaatigut — ajorsaateqarata imaluunniit annikilliorata inuuvugut. . . . Inuunera imaqarnerulersutut ippoq — inuit eqqortumik isumallit ikiorsinnaavakka paasitinniarlugit Guutimik ujarlersut taassumannga ungasinngimmata.“ Pioneerit piffissami pingaaruteqartumi inuunerput malugisinnaavaat taamaattumillu inuunermi pisariaqartut naammagalugit anersaakkut naleqarnerusut inuunermik naassaanngitsumik kinguneqartut ujartorlugit. — 1 Tim. 6:8, 18, 19.
4 Pissutsit atukkavit pisinnaatippatsit, sooq nunarsuaq tamakkerlugu qatanngutinut angutinut arnanullu hundredetusintilikkuutaanut pioneerinut ilanngukkuit? Taamaaliornikkut nuannaarneq pigisaasa assigat angusinnaassavat.