Allat Guutip piumasaqaataanik ilinniartikkit
1 Suli inuppassuaqarpoq ’Guutip oqaasia tusarlugu’ periarfissinneqanngitsunik. (Amos 8:11) Ilaasa Guutip piunera upperaat siunertaali piumasaqaataalu ilisimanagit. Taamaattumik sallusuissummik Naalagaaffimmik annatitsisinnaasumik ilinniartissallutigik pisariaqartitsisoqarpoq. Sakkussalersorluarnikkut aammalu sukkulluunniit oqaluussisarnissamut piareersarnikkut Jehovap piumasaqaataanik ilikkarusuttut ilinniartissinnaavavut.
2 Apriilimi maajimilu Napasuliaq Alapernaarsuiffik-mik Iteritsi!-mik normut immikkut ittut agguaatissavavut. Aammattaaq siullerpaamik atuagassiaaraq Guutip sumik piumaffigaatigut? neqeroorutigissavarput. Atuagassiaaqqap assiliartaasa maluginiarnartut apeqqutaasalu eqqarsalersitsisut qularnanngitsumik inuppassuarnut kajuminnartunngortissavaat. Siunnersuutit tulliuttut atuagassiaatitta sunniuteqarluartumik atornissaannik ikiorsinnaavaatigut.
3 Inuit naapinniakkit: Angalaartarfigisaq tamaat angalaarfigereerlugu amerlasuut angerlasimanngikkaangata malugineqarsimavoq inunnut sumiluunniit naapitanut saaffiginnittarneq iluaqutaasoq. Naalagaaffimmut Kiffartorneq-mi septembari 1996-imoortumi quppernerit 3-6-imi kajumissaarneqarpugut nutaarsiassaq nuannersoq sumiluunniit oqaluussissutigeqqullugu — aqqusinermi, angallatini, illoqannginnersami, biilit unittarfiini niuerniartarfeqarfinnilu. Kajumissaarneqarpuguttaaq sukkulluunniit oqaluussinissamut nammineq periarfissiornissatsinnik eqqumaffiginninnissatsinnut. Tamatumunnga assersuutissaqarpoq qatanngut arnaq uumasuusivimmukarsimammat atuagassianik Vågn op!-inik 8. aggusti 1996-imoortunik ilanngutassiaq „Behøver vi at bekymre os om de truede dyrearter?“ nassataqarluni. Nalunaaquttap-akunnerata ataatsip ingerlanerinnaani uumasunik nuannarisaqartunut qujamasuttunut atuagassiat 40-it tunniussimavai. Nutaarsiassamik nuannersumik sumiluunniit oqaluussisarninni manna tikillugu sunik misigisaqartarsimavit? Napasuliaq Alapernaarsuiffik Iteritsi!-lu atuagassiaararlu Guutip sumik piumaffigaatit? ilanngullugu oqaluusseriaatsinut tamanut naleqquttuupput paasissutissanik inuit inuunerannut attuumassuteqartunik eqqarsalersitsisunillu imaqaramik.
4 Oqaloqatigiinnissamut aallarniut: Naalagaaffimmut Kiffartorneq-mi oktobari 1996-imoortumi tunuani siunnersuuteqarpoq Napasuliaq Alapernaarsuiffik Iteritsi!-lu qanoq saqqummiunnissaannut piareersartoqarsinnaasoq. Siunnersuutit atorneqarsinnaapputtaaq atuagassiaaraq Guutip sumik piumaffigaatigut? saqqummiukkutsigu. Aallarniutaa takisoorsuusariaqanngilaq, imaluunniit Biibilimi eqqarsaatit ilaannik taasaqarneq naammassinnaavoq. Aallarniutissatut oqaasissatit eqqarsaatigilluakkit pulaakkavit tusarnaaqqinnissaanut aalajangiisuusinnaammata. Ilaasa kinguneqarluartittarsimavaat imatut aallarniingaangamik: „Atuagassiami uani ilanngutassiaq pissanganartorujussuaq atuarakku, ilinnullu tamanna tuniukkusuppara.“ Imaluunniit pulaagaq peqataatinniarlugu soqutiginartumik apeqquteqartoqarsinnaavoq.
5 Angalaartarfissinnut naleqquppat imatut aperisinnaavutit:
◼ „Eqqagakorpassuit ullumikkut takusarpavut, mingutsitsinermik allaasaanerpassuarnillu avatangerneqarsimavugut. Qaquguluunniit allannguuteqartoqarsinnaasoraajuk?“ Pulaakkat akili, qanorlu ililluni tamanna pisinnaasoq paasissutissaateqarninnik aammalu qaqugu nunarsuaq tamarmi naatsiivissaarsuanngorumaartoq nassuiaaguk. Arlaannik aalajangersimasumik, allassimaffimmik ataatsimik atuagassianilu nutaani assiliartaanik qalipaatigissaartumik eqqaasaqarit, atuagassiarlu neqeroorutigalugu. Pulaakkannut naggasiitinnak tullianik oqaloqatigiinneq nangeqqikkumallugu isumaqatigiissuteqarit.
◼ „Isumaqarpit ullumikkut ajornartorsiutinik atugaqarnerput Guutip siunertarisimagaa?“ Pulaakkat akereerpat ima oqarsinnaavutit: „Immaqa Jesusip ajoqersukkaminut qinnut ajoqersuutigisimasaa nalunngilat; qinnutigeqquaa Guutip naalagaaffia tikiuteqqullugu. Guutip naalagaaffia sunaanersoq eqqarsaatigisimaviuk?“ Atuagassiaaqqami Guutip sumik piumaffigaatigut? ilinniagassaq 6 innersuussutigiuk, apeqqutillu ilinniagassani aallaqqaataatinneqartut atuarlugit. Immikkoortoq 1 atuariarlugu akissutaa siulleq tikkuarsinnaavat. Oqaluttuullugulu sinnerani apeqqutai taamatorluinnaq akineqartartut. Atuagassiaaraq neqeroorutigiuk, Naalagaaffillu pillugu annertunerusunik paasissutissaateqarnerarlutit tullianik aggeqqinnissannik isumaqatigiissuteqarfigiuk.
◼ „. . .-mik ateqarpunga. Inuppassuit silarsuarmi upperisarsiornerit aaqqiissutissaaninngarnit inuiaat ajornartorsiornerannut pissutaanerartarpaat. Illit qanoq isigaajuk?“ Pulaakkavit akissutaanut tusarnaareeruit atuagassiani nutaani immaqa soqutigisinnaasaanik takutissinnaavat; pineqartoq tassaasinnaavoq upperisarsiornerit qanoq ajornartoorsimasut, imaluunniit qanoq qanittukkut piuneerussaajumaartut. Atuagassiat atuarusunnerai aperiuk. Qanoq ateqarneranik aperiuk, aggeqqinnissallu neqeroorutigiuk sooq oqartoqarsinnaasoq upperisarsiornerup ilumoortup inuiaat neriorsulussinnanngikkai nassuiaakkumallugu.
◼ „Ullumikkut ilaqutariinni ajornartorsiutit amerlaqaat. Ilaqutariinnerup pilluarnartup suna isertugaatigineraa eqqarsaatigisimaviuk?“ Pulaakkat akili, nassuiaallugulu Biibilimi Guutip ilaqutariit pilluarlutik inuunissaannik isertugaat saqqummersissimagaa. Ilaatigut Jesaja 48:17 atuaruk. Atuagassiaaqqami Guutip sumik piumaffigaatigut? ilinniagassaq 8 atoruk, allassimaffiillu tassani allanneqartut ilaat ilaqutariinnut tamanut tutsuinginartumik siunnersuutaasut erseqqissarlugit. Ilinniagassami apeqqutit aallaqqaataatinneqartut atuakkit. Pulaakkat aperiuk akissutai atuarusussinnaanerai. Ajunngitsumik qisuariarpat atuagassiaaraq tunniussinnaavat. Aggeqqinnissat neqeroorutigiuk atoriaannaasunillu Biibilip siunnersuutaanik ilaqutariittut pilluarluni inuunissaq eqqarsaatigalugu takutikkumallugu.
6 Naalagaaffimmut Kiffartorneq-mi marsi 1997-imoortumi quppernerit 3-6-imi kajumissaarneqarpugut pulaaqqiisarnissamik nakimaannerunissatsinnut. Atuagassiaaqqap nutaap atortarnissaa atuaqqissaaqateqalerniarnitsinni kajumissaarutigineqarpoq — pulaaqqaarnermiinngippat pulaaqqiinermi. Guutip piumasaqaatai tamakkulu tunngavigalugit iliuuseqarneq inuit atorfissaqartinnerpaartarivaat ilinniassallugit. (Kul. 1:9, 10) Allanut iluaqutaangaassaagut apriilimi maajimilu ilinniartissinnaagutsigik Jehovap sumik piumaffiginerai inuunermik tunisinnaammagit. — 1 Kor. 9:23.