Silarsuaq tamakkerlugu Peqatigiiffiup suliaanut aningaasanik tunissuteqarnikkut allilerinerit tapersersorsinnaavavut
Jesaja 54:2, 3-imi siulittuutigineqartutut Jehovamik pallorfiginninninneq minguitsoq nunarsuaq tamakkerlugu siumukartuarpoq. Tamannalu aamma Afrikap nunaani qanigisaanilu qeqertani pivoq. Ukiuni qulini kingullerni nunani ukunani Naalagaaffimmik suliniarnermik killilersuinerit atorunnaarsinneqarput: Angolami, Camerounimi, Etiopienimi, Madagaskarimi, Malawimi, Moçambiquemi, Togomi aamma Ækvatorialguineami. Taakkunani nunanilu allani narsaatini katersuiffissani Gilead-imit ajoqersuiartortitat, qatanngutit angutit Ilagiinnut Kiffartortunngortitat Ilinniarfiannit naammassisimasut, Betelimisulisut allallu, suliassat assigiinngitsut tigusarsimavaat. — Mat. 9:37, 38.
Jehovap peqatigiissortaani pallorfiginnittut ilumoortut amerliartuinnarmata soorunami nutaanik hundredelinnik naalagaaffilersaartarfinnik sanaartornissamik pisariaqarpoq. Ataatsimeersuartarfissanik nutaanik immikkoortortaqarfinnillu nutaanik imaluunniit allisitsilluni sanaartornissamik pilersaarusiornissaq pisariaqarsimavortaaq. Silarsuarmi tamarmi aningaasat Peqatigiiffiup suliaanut tunissutigineqartut amerlasuut aaqqissuinernut tamakkununnga atorneqarput Afrikamilu nunarsuullu ilaani allami Naalagaaffimmik suliap siuariartortuarsinnaaqqullugu.
Jehovas Vidners Årbog 1996-imi oqaluussisartut nunani taakkunani kiffartuussisimanerat takuneqarsinnaavoq. Nunani amerlasuuni amerliartorneqarsimaqaaq, ukiorlu kingulleq eqqaaniaanermut najuuttut amerlassusiisa takutippaat suli amerliartorneqartoq. Nunani allani nunarsuaq tamakkerlugu Naalagaaffimmik oqaluussissutiginnilluni suliniarneq ajoqersuganngortitsiniarnerlu eqqarsaatigissagutsigik, eqqaasinneqarpugut qanoq immikkut pisinnaatitaaffeqartugut pallorfiginninnerup ilumoortup nunap piinik pitsinnik tapersersorneratigut. — Lúk. 16:9; 1 Tim. 6:18. (kmD 8/96 Ved at bidrage . . .)