Kina oqaluussinissamut piukkunnarpa?
1 Oqaluussiartuleraangavit Mosesitut issimannginnerpit? Ima oqarpoq: „[Jehova], tusannga-aat. Uanga oqallorissuusimanngisaannarpunga maannalu uannut oqaloreerninni oqallorissinerunngilanga.“ (2 Mos. 4:10) Taamatut misigisimaguit oqaluussiartornissannut tunuarsimaartuusinnaavutit. Jesusilli ’inappaatigut inuit oqaluussiffigeqqullugit’. (ap. sul. 10:42) Taava qanoq nutaarsiassamik nuannersumik oqaluussissutiginninnissamut piukkunnarsisinnaavugut?
2 Imaanngilaq silamiutut ilinniagaqarnerup kiffartuussinissatsinnik piukkunnarsisikkaatigut. Paulus oqarsimavoq ’uvinngup piisigut ilisimassut amerlanngitsut, aammalu ’ilisimassummi silap matuma pia Guutimi sianiissutaavoq’. (1 Kor. 1:26; 3:19) Jesusip ajoqersukkani innuttaaqatigiinni akimannginnerusunit toqqarsimavai — taakkunannga minnerpaamik sisamat aalisartuupput. Upperisarsiornikkut siuttunit pingaarniartunit nikagineqarput ’ilinniartitaanngitsutut ilisimaatsutullu’ isigineqarlutik. Silamiut najoqqutassiaat malillugu apustilit oqaluussinissamut piukkunnanngillat. Kisiannili Piinsip ulluani Peterip oqalunnera inuit 3000-it kuisinnerannik kinguneqarpoq. — ap. sul. 2:14, 37-41; 4:13.
3 Jehovap oqaluussinissatsinnik piukkunnarsisippaatigut: Paulus oqarpoq: ’pisinnaassuserput Guutimit pivoq.’ (2 Kor. 3:5) Jehova, ilisarsinermut puilasuusoq, inuit millionilippassuit ajoqersorsimavai sallusuissummik Naalagaaffimmik allanut oqaluussissutiginninnissaannik. (Jes. 54:13) Suliap tamatuma inerititai takuneqarsinnaapput ukioq kingulleq 338.491-it kuisimmata ’allakkatut nersuutitut’ uumasutut. (2 Kor. 3:1-3) Pissutissaqarluarpugut qunusuilluta qularatalu Jehovamik ilikkakkavut oqaluussissutigissallugit.
4 Guutip peqatigiissortai nunarsuaq tamakkerlugu oqaluussinissamik ajoqersuinissamik pilersitsisimapput. Biibili biibililersaaruterpassuillu ikiortigalugit ilinniartinneqartarpugut ajoqersorneqartarlutalu, taamaalilluta oqaluussinissamut ’inerilluaqqulluta, piginnaanngorsagaaqqullutalu’. (2 Tim. 3:16, 17) Inuppassuit Peqatigiiffiup atuagassiaataasa ilisimatuussutsikkut eqqorluassusiat tupigusuutigisarpaat. Assersuutigalugu Sverigemi atuagassiami ima allassimavoq: „Jehovap nalunaajaasuisa upperisamik oqaluussissutiginninnerat Biibilimik ilisimatuussutsimut pitsaalluinnartumut tunngaveqarpoq.“
5 Ajoqersorneqarneq sapaatip-akunneranut tallimariarluta ataatsimiittarnitsinni pisagarput, nammineq atuaqqissaartarneq aammalu Biibilimik atuagassanit atuartarneq, Teokratiimik Atuarfimmi malittarisassat, inuttut immikkut oqaluussisartunit allanit misilittagaqarluartunit ikiorneqartarneq, tamanilli pingaarnerusumik Guutip anersaavanit ikiorneqarneq ikiortigalugit tatigisinnaavarput Jehovap oqaluussinissamut piukkunnartutut isigissagaatigut. Aap, ’Guutimit pineqartutut Guutip kiinaata saani Kristusimi oqaluppugut.’ — 2 Kor. 2:17.
6 Teokratiimi ajoqersorneqartarnerput Jehovap peqatigiissortamigut neqeroorutigisaa atorluarniarutsigu, tunuarsimaarnissatsinnut imaluunniit sioorasutut misiginissatsinnut pissutissaqanngilagut. Nuannaarluta allanut oqaluussisinnaavugut, qularinagu Jehovap ilungersornivut pilluaqqussagai. — 1 Kor. 3:6. (kmD 8/96 Hvem er egnede til at forkynde?)