Tamarmiusumik uummateqarit!
1 Jehovamut qujamasunnissatsinnut pissutissarpassuaqarpugut. Siornagut iliuuserisimasaanut, maannakkut iliuuserisaanut siunissamilu iliuuseriumaagaanut. Qujamasunnerup tamatuma qanoq iliuuseqalersittariaqarpaatigut? Tamanna Davidip tussiaasiaani erserpoq: „Jehova unnersiutigissavara ullut tamaasa, nersorinninnermik erinalersuutissaqartuarpunga.“ — Tuss. 34:1.
2 Biibilip erseqqissumik takutippaa oqaluussinissatsinnik peqquneqartugut. Suliaq uummammik tamarmiusumik suliaraarput, aap, ’tamaasa kajumilluta suliaraavut Jehovamullusooq’. (Kul. 3:23) Uummatikkut iluunngarluta tarnikkullu iluunngarluta kiffartuussissagutta qanoq annertugisumik kiffartuussissaagut? Asanninneq Jehovap uatsinnut ersersissimasaa eqqarsaatigigutsigu, uummatitta killissavaatigut ilungersorluta allat taassuminnga siunertaanillu nuanningaartunik oqaluttuunnissaannik. Kajumissaarneqarpugut sapinngisarput tamaat iliuuseqassasugut.
3 Ilimagineqarsinnaavoq inuup uummatimigut tamarmiusup kiffartuussinerup illernartup ulapputiginissaa kissaatigissagaa. Tussiaasiortoq taama misigisimassaaq, ima oqarami: „Ullormut arfineq-marloriarlunga unnersiutigisarpakkit inassutitit naapertuilluartut pillugit.“ (Tuss. 119:164) Tussiaasiortutut misigisut Jehovamik unnersiutiginninnissaminnik periarfissarsiortarput. Kiffaapput aallussilluartut pissutsit atukkatik naapertorlugit iliuuserisinnaasaminnik tamanik iliuuseqartartut.
4 Ullut tamaasa Jehovamik unnersiutiginninnissatsinnut periarfissarpassuaqarpugut: Nutaarsiassamik nuannersumik oqaluussinermi illumiit illumut angalaarneq kisimi periarfissaanngilaq. Suleqativut, atuaqativut, ilaquttavut nalunngisavullu Naalagaaffimmik tusarlerneqarnissartik aamma pisariaqartippaat. Feeriarnitsinni hotelimi sulisut, saqisut tankilerisut taxartitsisulluunniit oqaloqatigisinnaavavut immaqalu oqaluussiffiginissaannut periarfissarsilluta. Illoqarfitsinni eqqaamiutsinnut oqaluussisinnaavugut angerlarsimaffitsinnulluunniit kasuttortunut. Napparsimmavimmi uninngagutta napparsimasunik paarsisunut, nakorsanut uninngasunullu allanut sukkulluunniit nalunaajaasinnaavugut.
5 Sukkulluunniit oqaluussineq kinguneqarluartarpoq: Angutip qitornani illoqannginnersami pisuttuaqatigigaa, oqaluussisartut marluk taanna oqaloqatigilerpaat. Taassuma nuliatalu sallusuissut ilassivaat. Kingorna angut inuusuttoq oqaluttuarpoq tamatuma pinngitsiarnerani Guutimut qinusimalluni oqarluni: ’Ilumut piuguit taava ilisarilerlakkit.’ Illoqannginnersami pisimasoq tamanna qinnutiminut akissutitut isigaa.
6 Tamarmiusumik uummateqartut anersaakkut allanik ikiuerusuttut nuannaarnermik angisuumik misigissapput. Nalunngilaat ’uummatikkut iluunngarlutik’ kiffartuutertik Jehovap nuannarigaa. — 1 Isr. 28:9. (kmD 5/96 Vær helhjertet!)