Tusaarusuttoq qanoq ilillunga nassaarisinnaavara?
1 Illoqarfimmi Filippimi najugaqarsimavoq ’arnaq Lydiamik atilik . . . aappallarissunik nioqquteqartoq, . . . tusarnaartoq; taassuma uummataa Jehovap ammarpaa Paulusip oqaaserisai taassumunnga nalunaarsorsinnaanngortillugit.’ (ap. sul. 16:14) Oqaluttuap tamatuma takutippaa inuk tusarnaaraangat sallusuissummik ilikkarsinnaanissaminut ammaanneqartartoq. Naalagaaffimmik tusarliussaq pillugu oqaluussigaangatta kingunissaanut apeqqutaasarpoq pulaagaq tusarnaarusussuseqarnersoq. Tusarnaarusuttumik nassaaraangatta tusarliunniakkatta saqqummiunnissaa ajornarpallaartanngilaq. Unamminiarnartuusinnaavorli allanik tusarnaartitsiniarnissaq. Qanoq iliorsinnaavugut?
2 Oqaluussiartortinnata isumageqqaartariaqarparput isikkutta atortussattalu ajunngitsuunissaat. Sooq? Inuit torersumik pissusilimmut tusarnaarumanerusarmata. Tulluartunik pilimanianngitsunillu atisaqarpugut? Naak silarsuarmi pikatappasissumik atisalersorneq arlaannulluunniit takoqqusaarutitalinnik atisaqarneq nuannarineqaraluartoq uagut ilaarsisariaqanngilagut, kiffaagattami Guutip naalagaaffianit aallartitaasut. Ipiillutalu pissuserissaarnerput tusagassamik oqaluussissutigisatsinnik ajunngitsumik nalunaajaatiginneqataassapput.
3 Inussiarnersuugit ataqqinnittuullutillu: Naak silarsuarmi isummat allanngoraluaqisut suli Biibilimut ataqqinnittoqartarpoq, taakkulu Biibilip imarisai inussiarnersumik ataqqinnittumillu oqaluusererusussavaat. Eqqissisimasumik inussiarnersumillu pissuseqarnikkut ilumoortumillu qungujunnikkut pulaagaq eqqissitinneqarsinnaavoq ajunngitsumillu oqaloqatigiinnissaq aqqutissiuunneqarluni. Peqqusersuinnerput peqqissaarnerpullu oqaatsitsigut pissutsitsigullu ersertariaqarput, tamatumunngalu ilaavoq ataqqinnilluni pulaakkap oqaasiinik tusarnaarneq.
4 Allat neriuummik Biibilimeersumik avitseqatiginissaat siunertaraarput. Taamaattumik pulaagarput oqaloqatigilerutsigu akeqqersimaarpaluttumik unammillerpaluttumilluunniit pissuseqassanngilagut. Akerliorpasissup oqqateqatigineratigut piffissap atulussinnarnissaa pisariaqanngilaq. (2 Tim. 2:23-25) Naalagaaffimmik kiffartuuteqarneq-mi ’Ræsonnerebog’-imilu naammattunik kajumissinartunik maannakkullu pissutsinut naleqquttunik saqqummiusseriaaserpassuaqarpoq qiniinnagassanik. Soorunami saqqummiusseriaatsit tamakku sungiusarluartariaqarpavut, ajunngitsumik qularatalu oqalussinnaaqqulluta. — 1 Pît. 3:15
5 Pulaakkatta amerlanngitsuinnaat kingullermik oqaaserisimasavut eqqaamasinnaasarpaat. Tamarluinnangajammilli saqqummiusseriaaserput eqqaamasarpaat. Ilassiornerup inussiarnernerullu pingaaruteqassusiat suusupagissanngilarput. Angalaartarfitsinni nalunanngitsumik assersuutaasumik savanik amerlasuunik sallusuissummik tusarnaarusuttoqarpoq, soorlu ukiuni hundredelinni siullerni Lydia taamaaliorsimasoq. Takkorliunnerput oqalunnerpullu eqqumaffigigutsigik, inuit peqqusersuitsut Guutip oqaasiinik tusarnaarnissaannut ilassinninnissaannullu kajumilersissinnaavavut. — Mák. 4:20. (kmD 96/02 Hvordan kan jeg finde et lyttende øre?)