Biibilimik atuaqqissaaqatiginnittarneq: Pisussaasutut misigivit?
1 Biibilimik atuaqqissaarnermik siulersuinermik immikkut pisinnaatitaaffik tamakkerata pigivarput. Danmark nunanut oqaluussisartunut naleqqiullugit Biibilimik atuaqqissaaqateqartarnikinnerpaanut ilaavoq. Taamaallaat oqaluussisartut pingajui tamarmik Biibilimik atuaqqissaaqateqartarput. Suna pissutaava?
2 Qallunaat upperisarsiornermut soqutigisaqanngissusiat qularutissaanngitsumik pissutaanerpaavoq. Aamma paqumisunneq aatsaat taama ingasatsigilersimavoq. Tamanna uagutsinnut piumaffiginninnermik pilersitsivoq. Unamminiarnartorli tamanna nuannaarluta tiguarput. — Mat. 5:11, 12; Gal. 6:9.
3 Tamanna ajunnginnerpaamik angusaqarfiugiumallugu Paulusitut iliorluta tullitsinnik sapinngisamik ikiuinissarput inuttut pisussaaffittut isigisariaqarparput. — Atuaruk Rûmamiunut agdlagkat 1:14, 15.
4 Biibilimik atuaqqissaaqatitaarniaraanni siulersuiniaraannilu ’imminut naaggaarnissaq’ pisariaqarpoq. Piffissap aliikkutassanut atortakkatta ilaa allat ikiorniarlugit ’pilliutigisariaqarparput’. Eqqissisimaarneq nuannersuuvoq ikinngutivullu ajunngitsut ilagalugit nuannisarnissarput pisariaqartittarparput. Kisianni oqaluussinermut peqataanermuinnaanngitsoq aammali Biibilimik atuaqqissaaqateqalerniarluni ilungersuuteqarnissamut pisussaasutut misigisariaqarpugut. — Lúk. 9:23.
5 Danmarkimi suli atuaqqissaaqatitaartortoqartarpoq. Tusariassagimmi: „Qatanngutit arnat marluk Sjællandimi 1994-imi apriilimi angut inuusuttoq pulaagaat soqutiginninnermik ersersitsivoq. Qatanngutit pulaaqqippaat. Angut inuusuttoq ’Paratiisilersaarummik’ pivoq qatanngutillu angutip atuaqqissaaqatigisalerpaa. Siullermik atuaqqissaareerlutik aperaaq qanoq ililluni oqaluffeqarfimmit anisinnaanerluni. Tulliani atuaqqissaannginnermi anereersimavoq. Siumukarpoq, sapaatikkut aalajangersimasumik ataatsimiigiartarluni oktobarimilu 1994-imi ataatsimeersuaararnermut najuulluni. Biibili tamaat ’Oqaluttuarisaanilersaarullu’ qiteqqullugu atuareersimavai.“
6 Pisussaaffivut ilumoorukkutsigik Jehovap pilluaqqussavaatigut. Inuit sallusuissummik ujarlersut suli oqaluussiffigisartakkatsinniittut kisiisaanngitsoq pisussaaffigaavut, aammali pisussaaffigaarput tussiaasiortup Tussiaat 56:13-imi ima oqaatigisaa: „Neriorsuutikka ilinnut Guuti, pilliutinik qujaniutinik naammassissavakka.“ (kmD 95/02 Bibelstudiearbejdet: . . .)