Kristusip toqunerata nassatai pingaartikkit
1 ’Inuup ernera tikiutinngilaq kiffartorfigeqqulluni, kisianni kiffartussalluni inuuninilu akissatut tunniussallugu amerlasuut utertinneqaatissaannik.’ (Mat. 20:28) Inuk nunami inuusimasoq kinaluunniit Jesusip inuiannut iliuuserisimasaatut iliorsinnaasimanngilaq. Taassuma inuttut naammalluinnartutut inooriaasia toquneralu iluaqutigalugit tunissutit annerpaartaat pinissatsinnut periarfissaqalersimavugut, tassa inuunermik naassaanngitsumik. Taamaakkaluartorli inuit amerlanersaasa Kristusip pillutik iliuuserisimasaanik pingaartitsinngillat.
2 Pupissut qulit Jesusip ilaanni naapissimasai eqqarsaatigeriakkit. Jesus takulerlugu ima suaarpaat: ’Jesus-iaa, ajoqersuisoq, naakkigitigut.’ (Lúk. 17:13) Akillugit inatsisit naapertorlugit palasinut takutikkiartoqquai. Taavunnartillutik tamarmik tupinnartuliornikkut pupeerupput — Jesus Kristusip naakkinninneranik piviusumik ersiutaasumik.
3 Taakkuali ilaat ataasiinnaq qujaniarluni Jesusimut uterpoq. Ilaami qulingiluat? Ingerlaqqipput ajunngitsuliortimik qutsaviginissaa eqqarsaatiginagu. (Lúk. 17:15-17) Uagut kina imaluunniit kikkut assigaavut? Qujaniarluni utersimasoq assigerusupparput. Taanna ilumut pingaartitsivoq. Uagut tamatumunnga assingusumik Kristusip toqunerata nassatai pingaartinnerpavut?
4 Qanoq ililluta pingaartitsinerput takutissinnaagipput: Ukiut tamaasa Peqatigiiffiup eqqaaniaalluni nalliuttorsuaq sioqqullugu Bibelimi allassimaffiit aalajangersimasut atuarneqarnissaat siunnersuutigisarpaa. Bibelimi atuagassatut siunnersuutigineqartut Jehovas Vidners kalender 1992-imi aprilip ulluisa 12-iannit 17-iat ilanngullugu allassimapput. Jesusip toqunerata siuninnguani pisimasut atuarneratigut eqqarsaatigeqqissaarneratigullu pingaartitsinerput takutissinnaavarput.
5 Oqaluussinermi suliniuteqarnerput aamma eqqaaniaanermik pingaartitsinitsinnut ersiutaavoq. Utoqqaanertat katersuunnernik piareersaassapput pionerit oqaluussisartullu aprilimi oqaluussinermi annertunerusumik suliniuteqarnissaminnik pilersaarusiorsinnaaqqullugit.
6 Qaammammi matumani nunarsuaq tamakkerlugu tuusintilippassuit ikiorti-pioneritut kiffartuuteqartarput. Siorna aprilimi Danmarkimi ikiorti-pionerit 2400-usimapput. Nunatsinni 20-usimapput. Illit ukioq manna aprilimi peqataasinnaassavit? Ikiorti-pioneriusinnaanngikkuit taava sapinngisannik oqaluussinermi suliniuteqarnissat pilersaarutigiuk.
7 Allat pingaartitsilersinniakkit: Ukiut tamaasa soqutiginnittorpassuit ilagaluta eqqaaniaalluni nalliuttorsuaq najuuffigisarpaat. Siorna 10.650.158-it najuussimapput taakkualu ilaat 6.000.000-init amerlanerusut oqaluussisartuunngillat. Taamaattumik amerliartornissamut periarfissaqarluarpoq.
8 Peqatigiiffimmit qaaqqusissut naqitat atortariaqarpavut pisariaqarpallu atuaqqissaaqatitta soqutiginnittullu allat aqqusaarnissaat isumagisariaqarlugu. Qaaqqugukkit pingaartitsininnik malugitinniakkit.
9 Ikiorniakkit paaseqqullugit sooq eqqaaniaalluni nalliuttorsuaq pilersinneqarsimasoq, kikkut assersuutinik ilangeeqataassasut assersuutillu qanoq isumaqartut. (1 Kor. 11:23-26) Nassuiaruttaaq assersuutinik ilangiisut najuuttullu sinneri tamarmik immikkut sunik neriugisaqartut. (sar. 14:3, 4) Taava soqutiginnittut paasinerusinnaassavaat kikkut tamarmik uppernertik iliuutsimikkut takutittariaqaraat eqqaaniaanermullu najuutiinnarneq naammanngitsoq. — Juán. 3:16.
10 Kristusip toquneranik eqqaaniaalluni nalliuttorsiorneq immikkut ittuuvoq. Peqqissaartumik piareersarsimagutta takutissinnaavarput Jehovap Kristusillu uatsinnut iliuuserisimasaat tamaasa uummatitsigut pingaartikkivut. Aamma atuaqqissaaqatitta soqutiginnittullu allat eqqaaniaanermik tamatuminnga pingaartitsilersinniarnerisigut Jehovap ernini Jesus Kristus aqqutigalugu annaassissutaanut uppersuseqalernissaannut ikiorsinnaassavavut. (km 92/4 Værdsæt betydningen af Jesu død)