Kalaallit nunaanni Jehovap Nalunaajaasuinut tamanut
Asasavut qatanngutivut!
Qaammat aamma ulapaarfiusoq qaangiutereerpoq, julillu qaammataani kiffartorsimanissinnik nalunaarusiarsi ima isikkoqarpoq:
Oqal. Atuakk. Broch. Nal.ak. Pisart. Atuag. Pulaaqq. Atuaqq.
Jul. 121 215 418 2156 34 2767 788 73
Agg. 11,3 16,4 4,4 0,5
Naak ilarpassuasi sulinngiffeqarlutik Danmarkimiissimagaluartut, Nuummilu ataatsimeersuarnermut piareersarlusi ulapissimagaluarlusi, kiffartornissinni ajunngitsumik angusaqarsimavusi. Sutigut tamatigut siornarnit siuariarsimavusi. Oqaluussisartut amerlassusiat siorna agguaqatigiissillugu angusamit 7 procentimik anneruvoq atuaqqissaaqatigiissimanerillu 73-it nalunaarutigineqarsimapput. Kiffartorneq nersortarialik.
Nuummi ataatsimeersuarneq pillugu qatanngut Arne S. Nielsen qiimmaallannartumik nalunaarusiorsimavoq, ataatsimeersuarnermillu ineriartornartumik uppernikkullu nakussatsinnartumik nuannaarutiginninnersi qiimasuutiginninnersilu paasilluarsinnaavavut. Ataatsimeersuarnermi anersaaq pitsaasoq qatanngut Nielsenip erseqqissarpaa, oqalugiaatillu piareersagaalluartut saqqummiunneqarneranni peqqissaassuseq annertooq eqqartorlugu. Tamanna ersiutaavoq ilissi ataatsimeersuarnermi suliassaqartitaasimasusi paasilluinnarsimagissi Jehovap innuttaanik oqaatsinik minguitsunik ilinniartitsinermi Jehovamit atorneqarnersi immikkut pisinnaatitaaffiusoq angisooq. Tamannalu ilutigalugu erserpoq Korintumiunut agdlagkat sujugdlît 4:2-mi Paulusip eqqartugaanik eqqortitserusunnersi: ’Pilittat piumaffigineqartarput ilumuussasut.’ (Aammattaaq takuuk Timûtiusimut agdlagkat sujugdlît 4:16.) Aammattaaq nuannaarutigeqaarput arfineq-marluk kuisimmata.
Maanna aasaq naangajalerluni ukialernerani kajumissaarusuppatsigit illumiit-illumut angalaarnermi, pulaaqqiinermi siornatigullu atuaqqissaaqatigisimasassinnik sapinngisarsi tamaat amerlanerusunik atuaqqissaaqatigisartagaqalerniaqqullusi. Oktoberimi immikkut suliniuteqarnissami annertunersumik kiffartornissamut periarfissatit atorluakkit, immaqa ikiorti-pioneriunikkut. Misilittakkat ersersippaat Kalaallit Nunaanni amerlasuut atuaqqissaarusuttuusut aammalu atuaqqissaaqatitaarniarneq ajornarpallaanngitsuusoq. Pissutsit atukkat eqqarsaatigalugit Kalaallit Nunaanni atuaqqissaaqatigiinnerit Danmarkimit amerlanerupput. Tamannali ilutigalugu amerlassusiat qaammammiit qaammammut nikerartuuvoq. Qanoq ililluni Bibelimik atuaqqissaaqatitaartoqarsinnaanera aalajangersimasumillu akuttunngitsumik inerititaqarnartumik atuaqqissaaqatigiittoqarsinnaanera pillugit qaammatini aggersuni Naalagaaffimmik Kiffartuuteqarneq-mi atoriaannaasunik misiligarluarneqarsimasunillu siunnersuuterpassuaqassaaq. Ammasuugit paqumisuttooqinallu, siunnersuutillu atukkit. Immaqa siunnersuutit ilaat Kalaallit Nunaanni pissutsinut naleqqussagassaassapput, misileqqaakkilli! Eqqaamajuk ’Guutip suleqatigimmatigut’, paasilluarullu tamanna sumik nassataqartussaasoq. Aap, ’illuliortutut ilisimasutut qanoq ittumik qarmaanerlusi sianigisiuk’. — 1 Kor. 3:5-10.
Ilissinnik suleqatiginninnerput nuannaarutigeqaarput, qinuvugullu Jehovap inaarutaasumik pissutsinut akuliutinnginnerani silarsuarmillu nutaamik atuutilersitsinnginnerani inunnik iluartuliorusuttunik katersuillusi ilungersornisi Jehovap pilluaqqujuassagai. (2 Pîtr. 3:13) Asannittumik inuulluaritsi.
Qatanngutisi
Vagttårnets Bibel- og Traktatselskab
Oqaluussinermut tunngasumik ataatsimiinnermi tulliuttumi saqqummiunneqassaaq