Kalaallit nunaanni Jehovap Nalunaajaasuinut tamanut
Asasavut qatanngutivut!
Oktoberip qaammataani oqaluussisimanissi inerneri nalunaarutigisinnaagatsigik nuannaarutigaarput. Nalunaarusiaq imaappoq:
Oqal. Atuakk. Broch. Nal.ak. Pisart. Atuag. Pulaaqq. Atuaqq.
Okt. 120 324 235 3439 86 5443 1329 85
Agg. 12,0 16,4 5,3 0,5
TASSA OQALUUSSISARTUT AMERLANERPAAFFIAT TULLERIIGINNARNIK AAPPASSAA QAANGEQQIPPARSI! Nuannaarutissavut amerlaqaat. Oqaluussisartut 32-t, tassa oqaluussisartut 27 procentii, piffissartik annertooq atorlugu arlaatigut kiffartuuteqartuupput. Aammattaaq nalunaaquttap-akunnerisa taama amerlatigisut oqaluussinermi atorneqarsimanerat nersualaarutissaavoq. Bibelimik atuaqqissaaqatigiinnermik sulineq siuariartorluartuuvoq atuaqqissaaqatiginninnerillu septemberimi nalunaarutigineqartunit 14-inik amerlanerupput. Pulaaqqiinermik ilungersuutiginninnerunersi siuariarsimanermut tamatumunnga pissutaasimassaaq, pulaaqqiinerimmi qaammammi kingullermi pulaaqqiinernit 165-imik amerlanerugamik.
Qaammatini kingullerni arfininngornikkut atuagassiat atorlugit angalaartarnissatsinnut kaammattorneqartarsimavugut, nalunaarusiamilu takuneqarsinnaavoq kaammattuutit tamakku maleruarsimagisi. Erseqqissarumavarpulli qaammammi neqeroorummik neqeroorutiginnittarneq atorlugu Bibelimilu allassimaffik tunngavigalugu oqaloqatigiissutissaq atorlugu angalaartarnerup piffissartuutiginissaa suli pisariaqarluinnarmat. Tamanna oqaluussinermi nammineq nuannaarnitsinnut qiimasunnitsinnullu pingaaruteqartorujussuuvoq, ajoqersuganngortitsiniarnermillu tamatta immikkut akisussaaffitsinnik naammassinninniarnitsinnut iluaqutaassalluni. (Mat. 28:19, 20) Jesusip ajoqersuganngortitseqqussutaata oqaatsit uku aallaqqaatigai: „Taamaattumik aallaritsi . . . ajoqersuganngortitsigitsi.“ (NV) Versi 18-imi takutinneqarpoq suna tunngavigalugu Jesus taama peqqussuteqarsinnaasimasoq. Ima oqarpoq: ’Qilammi nunamilu piginnaaneq tamarmi uannut tunniussaavoq.’ Tassa taassuma taama peqqusinera eqqortuliorneruvoq, taanna taama peqqusinerminut pisariaqartumik piginnaaneqarlunilu pissaaneqarpoq. Kinguneqarluarnartumik Bibelimik atuinermik pingaartitsilluta oqaluusseriaaseqarutta peqqussummik tamatuminnga maleruaanissatsinnut nammineerluta pisussaaffitsinnik eqqortitsinissarput ajornannginnerussaaq. Ilanngutassiami „Ajoqersuganngortitsineq — tamatta immikkut akisussaaffipput“-mi Naalagaaffimmik Kiffartuuteqarneq-mi decemberi 1989-imi saqqummersumiittumi eqqarsaaterpassuit pitsaasut ilumoorussaasullu eqqarsaatigeqqissaajutigalugit illit oqaluusseriaatsit isiginnittaatsillu isumaliutigeriakkit.
Nuannaarutigalugu ilisimatitsissutigisinnaavarput ilageeqatigiit ataatsimeersuarnerat sioqqullugu pionerinik ataatsimiititsisarneq pionerit Kalaallit Nunaanniittut iluaqutissaannut Nuummi 1990-imi ataatsimeersuarnermut atatillugu ingerlanneqassammat. Qatanngut immikkoortortaqarfimmeersoq ataatsimeersuarnermik nakkutilliisuutitaq pionerinik ataatsimiititsisuussaaq.
Ilagiit oqaluussinerannik nalunaarusiaq Telefaxikkut Peqatigiiffimmut nassiunneqaraangat nalunaarusiap allagartaata allakkerisarfikkut nassiunneqarnissaa pisariaqassanngilaq.
Ilissi peqatigalusi Jesusip ajoqersuganngortitseqqussutaanik maleruaasinnaanerput nuannaarutigalugu asannittumik inuulluaqquassi.
Qatanngutisi
Vagttårnets Bibel- og Traktatselskab