NALUNNGILIUK?

Jiisusip nalaani naalaffimmi qanoq tunissu­teqarto­qartarpa?

Naalaffiup erlinnartuusivia arnanut silarliliamiippoq. Atuakkami The Temple — Its Ministry and Services-imi ima allassimavoq: “Arnanut silarliliaq kaajallallugu pilimanianngitsumik torsuusaqarpoq, tassanilu qarmap tungaani 13-inik aningaasanik nakkaatitsiveqarpoq, imaluunniit ‘qarlortaateqarpoq’.”

Aningaasanik nakkaatitsiviit qulaa-tungaat amikkamik ataallu silillutik qarlortaatinik taaneqartarput. Aningaasat tunissutigineqarsimasut sumut atorneqarnissaat nakkaatitsivinni tamani allassimasarpoq. Jiisusi inuit, ilaatigut uillarneq piitsoq, aningaasanik nakkaatitsivilianut nakkaatitsisut qimerlooramigit arnanut silarliliamiippoq. — Lukasi 21:1, 2.

Aningaasanik nakkaatitsiviit marluk siulliit ukiumi atuuttumi ukiullu kingulliup tulliani naalaffimmut akileraarutinut atorneqartarput. Aningaasanik nakkaatitsiviit 3-miit 7-imut tuinut quluartartunut, tuit piaraannut, qisussanut, tipigissaatinut ermutsinullu kuultiusunut akiliinermut atorneqartarput. Pilliuteqartoq aningaasat pilliutigineqartumut piumasaqaatigineqartut sinnerlugit tunissuteqaruni aningaasat sinneruttut nakkaatitsivinnut allanut nakkartittarpai. Pilliummik ajortaaruteqqussummik pisinermi aningaasat sinneruttut aningaasanik nakkaatitsiviit arfineq-pingajuannut nakkartinneqartarput. Aningaasanik nakkaatitsiviit 9-miit 12-imut aningaasanut pilliutinit pisuutitaajunnaaqqusissutinit, timmissanik pilliutinit, nasiræerit pilliutaannit pupissullu minguiarneqarsimasut pilliutaannit sinneruttunut atorneqartarput. Aningaasanik nakkaatitsiviit 13-iat kajumissutsimik tunissutinut atorneqartarpoq.

Biibilimik allaqataasoq Lukasi oqaluttuari­saanermik atuakkiortuua tatiginartoq?

Lukasip iivangkiiliu aterminik taaguutilik aamma atuagaq Apustilit Suliaat allappai. Lukasip suut ‘tamaasa aallaqqaataaniit sukumiisumik misissorsimanerarpai’, ilisimatuulli ilaasa taassuma oqaluttuaani paasissutissat apeqqusersimavaat. (Lukasi 1:3) Lukasi oqaluttuarisaanermik ilisimatuutut qanoq tatiginartigiva?

Lukasip oqaluttuarisaanermi pisimasuiit uppernarsarneqarsinnaasut eqqaavai. Assersuutigalugu Romamiut atorfilittaasa taaguutaat amerlasuunit ilisimaneqanngitsut arlallit — soorlu Filippimi illoqarfimmi atorfillit, Thessalonikami illoqarfimmi pisortat, Efesosimi atorfillit annerit — oqaatsit eqqortut nagguiusut atorlugit allappai. (Apustilit Suliaat 16:20; 17:6; 19:31) Lukasip Herodesi Antipasi nunamut naalagaasutut aamma Sergiusi Paulusi naalagaatitatut taavai. — Apustilit Suliaat 13:1, 7.

Romamiut nunami pigisaanni aqutseriaaseq allanngortinneqaraangat tamatumani nakkutilliisup taaguutaa aamma allanngortinneqartarmat Lukasip taaguutinik eqqortumik atuinera maluginiarnarpoq. Biibilimik misissueqqissaartartoq Bruce Metzger oqarpoq “Apustilit Suliaanni taaguutit taamaattut sumiiffimmut piffissamullu eqqartorneqartumut naapertuuttuaannarnerannik ersersitsisut”. Ilisimatuup William Ramsayp Lukasi “oqaluttuarisaanermik ilisimatuutut imaannaanngitsutut” eqqaavaa.