Guutip pisuussutinik neriorsorpaatit?
‘Guutip pisuujunissat — amerlanerusunik biileqarnissat, siumukartumik pisiniarfiuteqarnissat — kissaatigaa. Upperfigiinnassavat, aningaasiviit ammarlugu aningaasallu tunniussinnaasatit tamaasa taassumunnga tunniullugit.’
BRASILIAMI aviisi naapertorlugu Brasiliami upperisarsioqatigiinnit assigiinngitsorpassuarnit tamanna tusarliunneqartarpoq. Tusarliussaq tamanna inuppassuarnit pimoorunneqartarpoq. Amerikamiut kristumiuunerartut akornanni atuagassiap Time-p misissuinerani makku paasineqarput: “61%-ii isumaqarput Guutip kissaatigigaa inuit pigissaartuussasut. 31%-iilu . . . isumaqarput aningaasaatitit Guutimut tunniukkukkit, Guutip aningaasanik amerlanernik pilluaqqujumaaraatit.”
Isumaliortaaseq tamanna, ‘upperisarsiornermik pigissaarnermut tunngasumik’ taaneqarajuttoq, nunani Latinamerikamiittuni, soorlu Brasiliami, nalinginnaaleraluttuinnarpoq. Inuit ilagiinnut Guutip pigisatigut imminnik pilluaqqusiumaarneranik neriorsuisunut orniguttarput. Kisiannili ilumoorpa Guutip neriorsoraatigut kiffartorfigigutsinni pisuunngortikkumaarluta? Itsaq Guutip kiffai tamarmik pigissaartuuppat?
Ilumoorpoq Guutip pilluaqqusinera Allakkani Hebræerisuuni pigissaarnermut tunngatinneqartartoq. Assersuutigalugu 5 Mosesi 8:18-imi ima allassimavoq: “Eqqaamaniaruk [Jehovap] Guutivit nukississimammatit pisuussutinik pissarsisinnaanngortillutit.” Taamaalillutik Israelikkut uppernarsaavigineqarput Guutip inuiaqatigiittut pigissaartunngortikkumaaraatik taassumunnga naalakkunik.
Inuimmi ataasiakkaatut? Angut aalajaatsoq Jobi pisoorsuuvoq, Saatanimillu piitsunngortinneqareersoq Jehovap taanna “pigisarisimasaasa marloriaataannik pigisaqalersippaa”. (Jobi 1:3; 42:10) Aaperaat aamma pisuujuvoq. 1 Mosesi 13:2-mi allassimavoq ‘pisoorsuusoq nersutaatinik sølvimillu kuultimillu peqangaarluni’. Kunngit kangisissormiut sisamat sakkutuuisa Aaperaap jorngua Loti tigusarimmassuk, Aaperaap ‘inussiaatini illumini inunngortut angutit 318-it sakkulisarsinnaasut katersorpai’. (1 Mosesi 14:14) Aaperaat ‘sakkulisarsinnaasunik’ 318-inik angutitaqarsimaguni inoqutai amerlasimassaqaat. Aamma inoqutigiinniittunik taama amerlatigisunik inuussuteqartitsisinnaaneranit erserpoq pisoorsuusimasoq nersutaaterpassuaqartoq.
Aap, itsaq Guutip kiffaasa ilarpassui — ilaannamininngui taassagaanni, Aaperaat, Iisaaq, Jaaku, Daavi Salomolu — pisuujupput. Imaappali Guutip imminut kiffartortut tamaasa pisuunngortissagai? Aamma inuk piitsuuguni, taava imaappa Guutimit akuerisaanngitsoq? Tamanna allaaserisani tulliuttuni sammineqassaaq.