„Sunaana sallusuissut?“

ROMAMIUT naalagaatitaata Pontiusi-Pilatusip suusupaginnippalulluni Jiisusi taama aperaa. Akineqarusunngilaq, aammami Jiisusip akinngilaa. Immaqa Pilatusip sallusuissut nassuiaruminaappallaartutut paasiuminaappallaartutullu isigaa. — Johannesi 18:38.

Ullumikkut inuit ilarpassui, ilaatigut ilinniartitsisut, upperisarsiornikkut siuttut politikerillu ilaat, taamatupajaaq sallusuissummik suusupaginnipput. Taakkua sallusuissut — ingammik ileqqussanut anersaakkullu ittunut tunngatillugu — aalajangersimasutuunngitsoq assigiinngitsumilli paasineqarsinnaasutut allanngorartuartutullu isigaat. Taamaalillutik oqaatigimisaarpaat inuit tamarmik immikkut aalajangersinnaagaat suna eqqortuunersoq sunalu eqqunngitsuunersoq. (Esaja 5:20, 21) Taakku aamma isumaqarput siulitta pingaartitaasa ileqqussatigullu najoqqutassiaasa atorunnaarnissaat ajunngitsoq, isumaqaraanni itsangavallaartut.

Maluginiarnarpoq sooq Pilatusi qulaani allassimasutut aperinersoq. Taama aperinngitsiarnerani Jiisusi ima oqarpoq: „Taamaattumik inunngorpunga, taamaattumillu silarsuarmut pivunga sallusuissut nalunaajaassutigissallugu.“ (Johannesi 18:37) Sallusuissut Jiisusimut nassuiaruminaatsuunanilu paasiuminaanngilaq. Ajoqersukkani ima neriorsorpai: „Sallusuissut ilisimalissavarsi, sallusuissutsillu inussiaajunnaarsissavaasi.“ — Johannesi 8:32.

Sallusuissut tamanna sumi nanineqarsinnaava? Ilaanni Jiisusi Guutimut qinulluni ima oqarpoq: „Oqaatsitit sallusuissutaapput.“ (Johannesi 17:17) Biibilimi Guutimit isumassarsiarititaasumi sallusuissut saqqummersinneqarpoq. Siunnersuutit Biibilimiittut tassanilu siunissamut neriuutissiissutigineqartoq — naassaanngitsumik inuunissamik neriuut — tutsuiginarput. — 2 Timotheusi 3:15-17.

Sallusuissut tamanna Pilatusip paaserusunngilaa. Illimmi? Soormi Jehovap Nalunaajaasui aperigukkit „sallusuissut“ Jiisusip eqqartugaa suunersoq? Piumaqalutik nassuiaakkumassavaatsit. (wE 10/1 07)