Adryanap kissaatigilluinnagaa
ADRYANA niviarsiaraavoq arfinilinnik ukiulik Tulsami Oklahomamiittumi najugalik. Tussiaasiortup Daavip kissaataanut assingusumik kissaateqarpoq, Daavi ima erinarsorpoq: „Manna kisiat [Jehovamit] kissaatigaara, ataaseq kipitsavigaara: Ineqarumallunga [Jehovap] illuani inuunera tamaat, tipaatsuutigisinnaajumallugu [Jehovap] alutornassusia, akissutisiffigiumallugulu naalaffiani.“ — Tussiaat 27:4.
Adryana affaannarmik ukioqartoq sianiutimigut alliartortumik kræfteqarnera paasineqarpoq. Nappaateqarnini pissutigalugu niui illuttut nukillaarput. Arlaleriarluni pilatsippoq ukiorsuarlu ataaseq kemoterapeertilluni.
Adryanap ataataa, Adryanap anaanaatalu upperisaqaqatiginngisaat, panimmi parkimut nuannaarniartarfimmut tusaamasaasumut tikeraarnissaanut ikiorsiivigineqarumalluni aningaasaateqarfimmut aalajangersimasumut saaffiginnippoq. Ikiornissaa akueritinnagu aningaasaateqarfimmit Adryana apeqqarissaarfigineqarpoq. Piukkunneqarnini qujamasuutigaa, oqaluttuuppaali nammineq Betelimut, Jehovap Nalunaajaasuisa silarsuaq tamakkerlugu sulinerannut aaqqissuussiffiusartumut New Yorkimiittumut tikeraarusunnerulluni. Adryanap paasigamiuk ataatani sumik qinnuteqarsimasoq Jehova qinnuigaa Betelimukarnissaminut periarfissaqalerumalluni. Aallaqqaammut aningaasaateqarfiup ernumassutigaa ilumut Beteli meeqqanut naleqquttuunersoq, ataataatali ajorinngimmagu kissaataa akuerineqarpoq.
Anaanani, angajuni ikinngutinilu ilagalugit Adryana New Yorkiliarpoq Betelimut takornariarluni. „Jehovap akivaanga,“ oqaluttuarpoq. „Qularutiginngilluinnarpara Betelimukarnissara isumagiumaaraa. Atuakkat, atuagassiat Biibilillu qanoq sananeqartarneri takuakka. Parkimut nuannaarniartarfimmukarnermit nuannernerungaarpoq.“
Adryanap ’Jehovap alutornassusia tipaatsuutigaa’ Jehovap Nalunaajaasuisalu qullersaqarfianni ullumikkut qanoq sulisoqartarneranik takunninnini qujamasuutigalugu. Illit aamma Betelimut tikeraarnissannut tikilluaqqusaavutit. Jehovap Nalunaajaasuisa qullersaqarfiata New Yorkimiittup saniatigut nunarsuarmi sumiiffinni allani amerlasuuni immikkoortortaqarfeqarpoq, ilaatigut Danmarkimi. (wE 15/4 07)