Innarluuteqaraluarluni ikiuerusuttorujussuaq

LEONARDO takoqqaarlugu sanasuunissaa takorlooruminaappoq. Tassami suliffimmi ajunaarnermi assani illuttut annaanikuuai. Leonardo innarluuteqaraluarluni sanaartornermi Acajutlami El Salvadorimiittumi, assimi takusinnaasatsitut, assoruulluni sulivoq.

Sanaartornermut tassunga peqataasinnaajumalluni Leonardop sakkussani nammineq isumassarsiarisani ilusilersortippai. Talini talerperleq assattaqanngitsoq orsilimmut saviminiusumut nivaatap tigummivianut qajannaarsimasumut ikkuteriarlugu nivalluni trillebøri issumik immertarpaa. Nammineq ajattarsinnaaniassagamiuk trillebørip tigummiviata isuatigut ammalortuusat ikkutitippai. Sooq sanaartorneq taamaattoq peqataaffigerusuppaa?

Leonardo naalagaaffilersaarfimmik, Jehovap Nalunaajaasuisa ilagiivisa taqqavaniittut pallorfiginnittarfissaannik sanaqataarusuppoq. Sanaartornermut peqataannginnissaminut pissutissarpassuaqaraluarpoq. Innarluuteqarpoq, ulloq naallugu suliffeqarluni ilagiinnilu kiffartortuulluni. Taamaakkaluartoq sapinngisani tamaat sanaartornermi ikiuukkusuppoq aamma taamatut Jehovamut kiffartorumalluni.

Illit aamma taama piumassuseqartigaat? Leonardop innarluuteqarnini utoqqatsissutiginagu isumassarsiullaqqinnini atorluarpaa sakkussanilu nammineq isumassarsiani ilusilersortillugit. Taamaalilluni suliami peqataaffigisinnaanngisaraluamini suleqataavoq. Guuti ’isumakkut iluunngarluni’ kiffartorfigaa. (Matthæusi 22:37) Kinaluunniit nunarsuaq tamakkerlugu Jehovap Nalunaajaasuisa naalagaaffilersaarfiinik sanaqataasoq, innarluuteqaraluaruni innarluuteqanngikkaluaruniluunniit, imminut pilliutigeriaannaanermik ersersitsivoq. Jehovap Nalunaajaasuisa ataatsimiinneri kikkunnut tamanut ammapput, illit aamma tikilluaqqusaavutit. (wE 4/15 07)