Ateqarsinnaatitaaneq
INUIT tamarmik ateqarsinnaatitaapput. Allaat naalungiarsuit angajoqqaaminnit qimanneqarsimasut Tahitimi atserneqartarput. Inunnik nalunaarsuisarfimmiit meeraq qimanneqarsimasoq atserneqartarpoq siuliaqummik kinguliaqummillu.
Oqartoqarsinnaavorli taamatut piginnaatitaaffimmik nalinginnaasumik, inuit tamangajalluinnarmik piginnaatitaaffigisaannik, kinaassusilik ataaseq atueqqusaanngitsoq. Tupinnaannartumik pineqartoq tassaavoq „Ataataq qilanni nunamilu ataataasut tamarmik ateqaatigisaat“. (Efesosimiut 3:14, 15) Erseqqippoq inuppassuit Pinngortitsisup aqqa Biibilimi allassimasoq atorumanngikkaat. Aqqa atornagu soorlu imaattunik taaguuteqatikkumaneruaat: „Guuti“, „Naalagaq“ imaluunniit „Naassaanngitsoq“. Qanormi ateqarami? Tussiaasiortoq ima allappoq: ’Illit kisivit — aqqit tassaasoq Jahve — Qutsinnerussaartuuvutit nunarsuarmi tamarmi.’ — Tussiaat 83:19a
1800-kkut affaanni siullermi ajoqersuiartortitat London Missionary Societymeersut Tahitimut tikinnerisa nalaanni taqqavanimiut guuterpassuarnik pallorfiginnipput. Guutii tamarmik immikkut ateqarput, taakkualu ilaasa pingaarnerit aqqi tassaapput Oro aamma Taaroa. Biibilip Guutia guutinit allanit immikkoortinniarlugu ajoqersuiartortitat Guutip aqqa kajumillutik atortarpaat, aterlu taanna Tahitimiutut Iehova-mik allanneqartarpoq.
Taamaattumik aqqa ilisimaneqarlualersimavoq ulluinnarnilu oqaloqatigiinnermi allattariarsornermilu atorneqartarsimalluni. Tahitip kunngiata Pomare II-ta, 1800-kkut aallartinneranni kunngiusup, allakkaangami atortarsimavaa. Allakkat quppernermi matumani takuneqarsinnaasut tamatumunnga uppernarsaataapput. Tuluttut allataapput takuneqarsinnaallutillu Tahitip qeqertallu eqqaaniittut katersugaasivianni. Allakkat taakkua uppernarsarpaat taamani Guutip aqqata atornissaa paqumisuutigineqanngitsoq. Aammattaaq Biibilimik nutsikkami Tahitimiutuumi siullermi, 1835-mi naammassineqartumi, takuneqarsinnaavoq Guutip aqqa tusindilikkuutaanik atorneqarsimasoq. wE 4/15 06
[Quppernerup ataani ilanngussaq]
a Biibilimik nutsikkani allani ateq Jahve atornagu ateq Jehova atorneqarpoq, soorlu Otto Fabriciusip 1822-mi kalaallisuunngortitaani.
[Qupp. 32-mi assiliartaq]
Kunngi Pomare II
[Qupp. 32-mi suminngaanneernera]
Kunngi allakkallu: Collection du Musée de Tahiti et de ses Îles, Punaauia, Tahiti