Ajunngitsunik ikinnguteqarusuppit?
INUIT AMERLANERIT ajunngitsunik ikinnguteqarusuttarput. Misigisat pillugit tatigisamut oqaluttuarsinnaaneq inuunermut iluaqutaasarpoq. Qanoq ilumoortunik ikinngutitaartoqarsinnaava? Ukiut 2000-ingajaat matuma siorna Jiisusip ersersippaa asanninneq namminissarsiunngitsoq allanut attaveqarnermi iluatsissagaanni pingaarnerpaasoq. Ima oqarpoq: „Qanoq inunnut iliorfigeqqugussi ilississaaq taamatut iliorfigisigit.“ (Lukasi 6:31) Taamatut oqarnerup, aamma maleruagassatut atortuujuaannartutut ilisimaneqartup, takutippaa ikinngutitaassagaanni namminissarsiortuunanilu nammineq iliuuseqarnissamut piareersimasariaqartoq. Naatsumik oqaatigalugu: Ikinngutitaassagaanni nammineq aamma ikinngutaasariaqarpoq. Qanoq ikinngutaasoqarsinnaagami?
Qanittumik ikinngutigiilluarneq ullormiit ullormut anguneqarsinnaanngilaq. Ikinngutit ilisarisimasaannaanngillat, tassaappulli qanimut attavigisat. Ikinngutigiittut attaveqatigiilissagaanni attaveqatigiittuassagaannilu iliuuseqartariaqarpoq. Ikinngutaaniaraanni ikinngutiginiakkap pisariaqartitai nammineq inuulluataarnissaraluamit salliutittariaqarput. Ikinngutigiit nuannersuinnarnik avitseqatigiinneq ajorput, aammali pakatsinartunik avitseqatigiittarput.
Ilumoortumik ikinngutaaneq ersertarpoq ikinngutaasumut misiginneqataanikkut taassumalu pisariaqartitsiffiatigut iliuuseqarnikkut. Ussatit 17:17-imi ima allassimavoq: „Ikinngutaasup asannissutsi tamatigut takutittarpaa, qatanngutaasorlu erniusimavoq annikilliornermi ikiortissaalluni.“ Ikinngutitut attaveqatigiinneq ilaquttanut attaveqatigiinnermit sakkortunerusinnaavoq. Soorlu Ussatit 18:24-mi oqaatigineqartoq: „Ikinngutigeeqarpoq imminnut ajortumik iliorfigisartunik, ikinngutaasoqartarporli qatanngummit unneqqarinnerusunik.“ Qanoq ililluni qanittumik ikinngutigiittoqalersinnaanersoq paasisaqarnerorusuppit? Inuit asaqatigiinnermik ilisarnaatillit ilagilerusuppigit? (Johannesi 13:35) Taamaappat najukkanni Jehovap Nalunaajaasuisa nuannaarlutik paasitikkusuppaatsit qanoq ilillutit ilumoortunik ikinngutitaarsinnaanersutit. (wE 3/1 06)