Illit ’Guutimi pisuujuit’?

JIISUSI KRISTUSIP assersuusiaasa eqqarsalersitsisut ilaanni eqqartorneqarpoq angut pisooq narsaatiminit pissarsilluarsimasoq. Siunissami toqqissisimanartuunissaa qulakkeerniarlugu annerusunik quiliorniarpoq. Jiisusip assersuusiaani angut taanna ’sianiitsutut’ taaneqarpoq. (Lukasi 12:16-21) Sooq taama sukannertigisumik eqqartuunneqarpa?

Pissutaagunarpoq angutip pisuup taassuma Guuti eqqarsaatiginagu pilersaarusiornera; narsaatimilu inerititaqarluarnera Guutimut ataqqinaataatinngimmagu. (Matthæusi 5:45) Usorsisimaarlunili ima oqarpoq: „Uumaangaa, perpassuaqarputit ukiorpassuarnut naammattunik. Eqqasuutaarupputit, nerillutillu imerniarit inuulluartaarlutillu.“ Aap, ilungersuutigisami inerititai „qarmarsuartut portusuutut“ illersuutissatut takorloorpai. — Ussatit 18:11.

Taama makitasuujunissamut mianersoqqussutitut ajoqersugaq Jaaku ima allappoq: „Maanna ilissi oqartartusi: ’Ullumi aqaguluunniit illoqarfiit arlaannukassaagut ukioq ilivitsoq tassaniilluta niuerniassalluta iluanaarniassallutalu’, ilissi inuunissi aqagu qanoq innissaanik ilisimasaqanngitsusi, tassaaginnarpusi pujoq ersersimatsiaannariarluni peeruttoq.“ — Jaaku 4:13, 14.

Oqaatsit taakkua Jiisusip assersuusiaani angummut pisuumut oqaatigineqartunit uppernarsarneqarput: „Sianiitsutit, unnuaru tarnit ilinnit qaaqquneqassaaq. Kiammi taava katersugarpassuatit pissavai?“ Putsutut peeruttutut angut pisooq taanna takorluukkani piviusunngunngitsut toqussaaq. Qanoruna Jiisusip ilinniartinniaraatigut? Ima oqarpoq: „Taama pisarpoq pisuussutinik katersisoq Guutimili pisuujunani.“ Illit ’Guutimi pisuujuit’? (wE 10/1 05)