Guutip naalagaaffianik oqaluussissutiginninnermit nutaarsiassat

Alejandramit allagarsiaq

ALLANNEQ sunniuteqarluartumik nalunaajaanermi qangalili atorneqartarpoq. Qanoq kinguneqassanersoq nalunartaraluartoq periaatsimik tamatuminnga atuiuartut pilluaqquneqangaarsimapput. Biibilimi silatuumik siunnersuut una eqqaamavaat: „Siaruartigassatit ullaakkut siaruarterniakkit unnukkuttaarlu assatit sarliaannartarnagit. Naluammi iliornerpit arlaat sorleq iluatsikkumaarnersoq imaluunniit marluk tamarmik iluatsikkumaarnersut.“ — Oqaluussisartup oqaasii 11:6.

Alejandra, arnaq inuusuttoq Mexicomi Jehovap Nalunaajaasuisa immikkoortortaqarfianni ukiut qulit missaanni sulereerluni, kræfteqarnini pillugu kemoterapi atorlugu katsorsarneqarpoq. Ajorsiartorpoq, ullormullu suliassat naammassinissaannut sanngiippallaalerluni. Kiffartorunnaarnissanili kissaatiginngilaa, aalajangerporlu allattarniarluni. Akeqanngitsumik Biibilimik atuaqqissaaqatigineqarnissamut periarfissaqartoq allakkamini nassuiarpaa, anaanamilu oqarasuaataata normua allallugu. Allakkani anaanaminut tunniuttarpai, taassumalu nalunaajaanermini nassartarpai angerlarsimanngitsoqaraangallu nakkartittarlugit.

Tamatuma nalaani arnaq inuusuttoq Guatemalameersoq, Diojanymik atilik, Cancúnimi Mexicomiittumi kiffaavoq. Tassani Jehovap Nalunaajaasui attavigilerpai, taakkulu Biibilimut tunngasunik oqaloqatigilluartarpai. Kingusinnerusukkut aappariit sullitai Mexico Citymut nuunniarlutik aalajangerput. Nooqataaqqummanni Diojany nangaavoq, taamaaliussaguni Jehovap Nalunaajaasuinut attaveqarunnaassagami.

„Ernumassanngilatit,“ sullitaasa oqarfigaat, „Jehovap Nalunaajaasui sumiiffinni tamaaniipput. Nuunniariarutta ujassavavut.“ Taama oqarmata Diojany aallaqataanissamut akuersivoq. Mexico Citymut nooreeramik Diojanyp sullitaasa Jehovap Nalunaajaasui ujalerpaat. Sunali pissutiginerlugu nanineq saperpaat, naak Jehovap Nalunaajaasui 41.000-t sinnillit ilagiillu 730-t illoqarfimmiikkaluartut.

Diojany Biibili pillugu oqaloqateqartarnini ingerlatiinnarusukkaluarlugu Jehovap Nalunaajaasui nanisinnaannginnamigit nikalloraluttuinnarpoq. Ullulli ilaanni ningiua takkuppoq oqarfigalugulu: „Tupaallaatissaqartippakkit! Guutivit qinnutitit tusarsimavai.“ Allakkat isaappai oqarlunilu: „Nalunaajaasut allaffigisimavaatsit.“ Alejandramit allagarsisimavoq.

Diojanyp Alejandrap arnaa qatanngutaalu atassuteqarfigilerpai Biibilimillu atuaqqissaaqatigineqarnissamut akuersilluni. Sapaatit akunnialui qaangiuttut Alejandra kiisami naapippaa, marluullutillu qiimmaallaatigeqaat. Alejandrap kajumissaarpaa Biibilimik atuaqqissaarnini ingerlatiinnaqqullugu anersaakkut siumukarniassammat.

Qaammatialuit qaangiuttut, juulimi 2003-mi, Alejandra toquvoq. Uppernermigut sapiissutsimigullu uppeqatiminut maligassiuilluarpoq. Ilisinermi Diojanymik naapitsinertik imalu oqarnera inuppassuit killitsissutigingaarpaat: „Alejandra ilaqutaalu uannut maligassiuilluaqaat. Jehovap kiffartorfiginissaa ungasinngitsukkullu kuisinnissara aalajangiuteqqavara. Paratiisissami Alejandrap takoqqinnissaa erinigaara!“

Aap, allakkat immaqa annikitsuinnaagaluarput. Ajunngitsumilli ataavartumillu sunniuteqarsinnaapput! (wE 10/1 04)