Neriorsuutit tatigineqarsinnaalerpata

OQALUTTUARISAANERMI neriorsuutinik eqquutit sinngitsuukkanik ulikkaarpoq. Nunat persuarsiutigalugu atsiorlutik saassussinnginnissamik isumaqatigiissutitik unioqqutikkajuppaat, tamatumuunalu innuttatik siooranartunik sorsulersittarlugit. Napoleon ilaanni oqarsimavoq: „Naalakkersuisut aatsaat pinngitsaalineqaraangamik neriorsuutitik eqquutitittarpaat, imaluunniit namminneq iluaqutissarigaangamikku.“

Inuimmi ataasiakkaat neriorsuutaat? Neriorsuutit eqquutitinngitsoorneqaraangata pakatsinartorujussuuvoq! Pingaartumik ilisarisimasaq tatigisarlu pineqaraangat. Soorunami inuit neriorsuutitik puigorsinnaavaat imaluunniit eqquutitikkusunnagit.

Inuit neriorsuutaat Guutillu neriorsuutai ila assigiinngeqaat! Guutip neriorsuutai tatiginarluinnarput uppernarlutillu. Jehova Guutip neriorsuutai tamarmik pinngitsooratik eqquutissapput. Guutip oqaasii uniuutinngisaannartut Esaja 55:11-mi oqaatigineqartumi takussaavoq: „Taama ippoq oqaasera qaninnit anisoq: Susaarluni uannut utissanngilaq, kisianni suliareqqusakka suliarissavai naammasseqqusakkalu naammassissallugit.“

Tassa neriorsuutit Guutip Biibilimi allanneqartissimasai qanoq isigisariaqarpavut? Tatigisinnaasatsitut. Assersuutigalugu apustili Johannesi allappoq: „Guuti ineqarfeqalerpoq inunni, taakkunani ineqarumaarpoq, innuttarissavaalu, Guutilu nammineq taakkunaniikkumaarpoq. Qulliillu tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.“ (Saqqummersitat 21:3, 4) Pilluaqqussutinik taamaattunik pissarseqataasinnaavutit Johannesi 17:3-mi Jiisusip oqaasii naapertorlugit ilioruit: „Inuunerlu naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.“ (wE 9/15 03)