„Marluk takkupput matutsinnullu kasuttorlutik“

„MAANNA ukiut marluk qaangiupput aliasuutigeqisatsinnik paninnguarput annaagatsigu.“ Franskit aviisiani, Le Progrés, Saint-Étienne-mi saqqummersartumi allakkat ammasut taamatut aallartipput.

„Mélissa pingasunik qaammateqarpoq trisomi 18-imik annilaarnartumik nappaateqarluni. Pisimasoq alianartoq naapertuilluanngitsutut misiginartoq qaangivinneqarsinnaanngilaq! Naak uigalu katuullitut perorsagaasimagaluarluta, apeqqut utertuarpoq, tassa: ’Guuteqaruni, sooq taamaattut akuerai?’“ Erseqqippoq arnaq allakkanik taakkuninnga allattoq aliasuttorujussuulluni ikiorneqarsinnaananilu misigisoq. Kisianni nangippoq:

„Pisimasup kinguninngua marluk takkupput matutsinnullu kasuttorlutik. Ingerlaannaq Jehovap Nalunaajaasorigai ilisaraakka inussiarnersumillu itigartinnissannut piareerlunga. Kisianni taava atuagassiaaraq tunniunniagaat malugilerpara, Guutip ajussuseq sooq akuerineraa pineqartoq. Aalajangerpunga isertinniarlugit qularinnginnakku tunngavilersuutaat atasinnaanngitsut. Isumaqarama ilaquttama misigisaat ajortut naammattut, oqaatsillu tusarneraluarlutik tunngaveqanngitsut naammalluartut tusarsimagatsigu soorlu: ’Guutip taassuminnga tunivaatigut, Guutillu tigoqqippaa.’ Nalunaajaasut nalunaaquttap akunnera ataaseq sinnilaarlugu tassaniipput. Misigeqatigingaarlunga tusarnaarpaannga, ilorrisimaangaarama animmata aggeqqeqquakka. Maanna ukiut marluk sinnereerpaat. Jehovap Nalunaajaasuinut ilanngussimanngilanga, kisianni Biibilimit atuaqqissaaqatigisalerpaannga, ataatsimiinnerilu tamangajaasa sapinngisannik najuuttarpunga.“ (wE 8/1 03)