Ulloq pingaarutilik

ULLUUVOQ inuiaat siunissaannik allannguilluinnartoq. Ulloq taanna aallarnerfigalugu inuit naassaanngitsumut pilluaqqusaasinnaalerput. Oqaluttuarisaanermi taama pingaaruteqartigisumik allamik ulloqanngilaq. Ullormi tassani Jiisusip nunami suliassani tamaasa naammassivai. Nappakkami naalliutsitaaffimmi kikiattugaaqqalluni toqulerluni ima suaarpoq: „Naammassivoq.“ (Johannesi 19:30) Suna pillugu Jiisusi nunamukarpa?

Tamanna Biibilimi ima akineqarpoq: „Inuup Ernera [tikiutinngilaq] kiffartorfigeqqulluni, namminerli kiffartussalluni inuuninilu akissatut tunniutissallugu amerlasuut utertinneqaatissaattut.“ (Matthæusi 20:28) Jiisusip tarnini, imaluunniit inuunini, tunniuppaa, inuiaat inunnguuseralugu ajorteqarnermit toqusarnermillu aniguisinnaaqqullugit. Aap, „Guutip silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.“ (Johannesi 3:16) Jiisusip pilliutaa nalissaqanngilluinnarpoq.

Ullup Jiisusip toquffiata eqqaamanissaanut allamik aamma pissutissaqarpugut. Ullormi tassani Jiisusip apustilini naleqangaartunik ilinniartippai aalajaattuaannarsinnaaqqullugit. Jiisusip toqunnginnermini nalunaaquttap akunnerini kingullerni oqaasiinut ajoqersukkat tusarnaarnertik killissutigisimassaqaat. Sunik ilinniartippai? Jiisusip taakkununnga ilinniartitsissutigisai uagut qanoq iluaqutigisinnaavavut? Apeqqutit taakku akineqassapput allaaserisami tullermi.