Inuuffigisaq pitsaanerpaaq

ATUKKANNIK misilinneqaraangavit „qanga ullut nuannersut“ maqaasigisarpigit? Taamaappat, kunngip Salomop oqaasii eqqarsaatigeriakkit: „Ima aperissanngilatit: „Sunaana pissutigalugu suut tamarmik itsaq pitsaanerusut?“ Ilisimassuseq tunngavigalugu taama aperinngilatit.“ — Oqaluussisartup oqaasii 7:10.

Sooq Salomo taama siunnersuiva? Nalunnginnamiuk qaangiutereersut piviusorsiortumik isigalugit massakkut pisut nuanninngitsut qaangerniarnissaanut iluaqutaalluarsinnaasoq. Inuit „qanga ullunik nuannersunik“ maqaasigisaqartut immaqa puigortarpaat aamma taamani ajornartorsiuteqartoq inuunerlu pitsaanerpaajusimanngisaannartoq. Immaqami taamani pitsaanerusoqarpoq, aammali ilimanarluinnarpoq ajortortaqarsimassasut. Salomop oqarneratut pereersunik eqqarsaatiginnittuaannarneq ilisimassuseqarnerunngilaq, nalunngilluinnaratsigu nalunaaqutaq utertissinnaanagu.

Pereersunik maqaasigisaqarneq ajoqutaasinnaagami? Aap, eqaatsumik periaaseqarnissatsinnut pissutsinullu massakkut atuuttunut naleqqussarnissatsinnut, imaluunniit inuunermik massakkut atukkatsinnik siunissatsinnilluunniit pingaartitsinnissatsinnut ajoqutigigutsigu ajoqutaasinnaavoq.

Naak avatangiisitsinni ajornartorsiutit silarsuarmi amerliartoraluartut maannakkorpiaq inuuffigisarput pitsaanerpaajuvoq. Sooq? Nunarsuatsinnik Guutip siunertaa naalagaaffiatalu eqqissisimasumik aqutsinerata pilluaqqussutai qanittuararsuanngoramik. Biibilimi neriorsuuteqarpoq: „Qulliit tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.“ (Saqqummersitat 21:4) Tamanna piviusunngorpat, pissutsit pitsaanerujussuanngorpata „qanga ullut nuannersut“ maqaasigissallugit kinaluunniit pissutissaarutissaaq. (wE 12/1 02)