Eqqasuuteqanngitsuusariaqarpit?

AMERLANERIT isumaqassagunarput inuttut eqqasuuteqanngitsut, tassa qasukkarsimasutut, eqqissisimasutut akaarinnittutullu, isumaqarfigineqarunik nersualaarneqarlutik. Eqqasuuteqannginnerli aamma allatut paasineqarsinnaavoq. Biibilimi allassimavoq: „Sianiitsut nungutitaassutigissavaat eqqasuuteqannginnertik“. (Ussatit 1:32) Tamanna qanoq paasisariaqarpa?

Hebræerit oqaasiat ’eqqasuuteqannginnermik’ nutserneqartoq Biibilimik nutsikkani allani ’soqutigisaqannginnermik’ (Den danske autoriserede oversættelse), ’imminut nuannarinnermik’ (The New American Bible) taavalu ’imminik naammaginermik’ (The New English Bible) nutserneqarsimavoq. Tassa eqqasuuteqannginneq eqiasunnermut soqutigisaqannginnermullu attuumassuteqartutut oqaatigineqarpoq, taamatuttaaq sianiinnermut.

Ukiuni hundredelinni siullerni ilagiit kristumiut Laodikeamiittut anersaakkut amigaatitik isumakuluutigisimagunanngilaat, imaluunniit soqutiginngilluinnarsimagunarpaat. Imminniinnaq naammagipput allaallu ’amingaateqannginnertik’ usorsisimaarutigalugu. Jiisusip oqaaqqissaarpai kajumissaarlugillu kristumiunngoqqeqqullugit ilungersortut. — Saqqummersitat 3:14-19.

Aamma Noap nalaani inuusut eqqasuuteqannginneq ilisarnaatigaat. Silarsuup piinik ulapputeqaannavissuupput, „nerillutik imerlutillu nuliartaarlutillu uinitsitsisarput . . ., aatsaallu paasisaqalerput ulersuaq nalliummat tamaasalu nungutillugit“. Taavalu Jiisusi nangippoq: „Taamatuttaaq aamma Inuup Ernerata tikiuffissaani ikkumaarpoq“. — Matthæusi 24:37-39.

Biibilimi siulittuutit eqquunnerisa takutippaat ulluni ’Inuup Ernerata tikiuffissaanik’ taaneqartuni, tassa ulluni Jiisusi Kristusip najuunnerani, maannakkut inuusugut. Qanortoq imminik naamagisutut, soqutigisaqanngitsutut imminullu nuannarisutut — tassa kukkusumik eqqasuuteqanngitsutut — pinngisaannarta. — Lukasi 21:29-36.  (wE 10/01 02)