’Arnaavutit pikkorissoq’

Oqaatsit nersualaarinnissutit taakku Moabikkuusumut inuusuttumut, Ruthimut, oqaatigineqarput. Uillarneruvoq, No’omillu, arnap juutiusup, ukuaraa. Israelimi ukiut 3000-t matuma siornatigut eqqartuusisut nalaanni Ruthi tusaamasaallualerpoq. (Ruthi 3:11, NV) Qanoq iliorami? Maligassiuinera qimerloorlugu kiap iluaqutigisinnaavaa?

Ruthi ’eqiasunnikkut pissarsianik’ nerineq ajorpoq. Narsaammi karrertaqarfinnik katersuilluni sivisuumik suleruloortarpoq, eqiasuinneratalu tusaamasaallualersippaa. Allaat oqinnerusumik sulinissamik neqeroorfigineqaraluarluni pisariaqanngitsumik suleruloortuarpoq. Arnamut pikkorissumut, suliumatuumut nersorneqartariaqartumullu Biibilimi oqaatigineqartumut assingulluinnarpoq. — Ussatit 31:10-31; Ruthi 2:7, 15-17.

Tassaana Ruthip anersaakkut piginnaanerisa — maniguunnerata, imminut tunniusimanerata asanninneratalu ilumoortup — ataqqineqangaalersikkaa. Angajoqqaani nunanilu qimallugit No’omi najuinnarpaa, naak aappariinnerup pilersitaanik toqqissisimaneq misigilersinnaagunanngikkaluarlugu. Ruthip aamma Jehova Guutimut, sakimi pallorfigisaanut kiffartorusunnini oqaatigaa. Naleqangaassusia Biibilimi oqaluttuami erseqqissarneqaqqippoq allassimammat: „Ernernit arfineq-marlunnit [No’omimut] pingaaruteqarneruvoq“. — Ruthi 1:16, 17; 2:11, 12; 4:15.

Ruthip nersorneqarnini pisassaaraa, pingaarnerpaavorli Guutip taassuma pissusii pingaartimmagit immikkullu pisinnaatitaaffimmik akilerlugu Jiisusi Kristusimut siuaasanngortillugu. (Matthæusi 1:5; 1 Petrusi 3:4) Ruthi, arnanut kristumiunuinnaanngitsoq, Jehovamulli kiffaanerartunut tamanut maligassaalluarpoq. (wE 6/15 02)