Inuunerit siunertaqarnerulersinnaava?

PIGISAP nalivia aalajangeruminaassinnaasarpoq. Aningaasat pappiarat USA-mi atorneqarsimasut naleqarnersaat 10.000 dollarinik naleqarpoq. Pappiararli naqinneqarfia centialunnguaannarnik naleqarpoq.

Eqqarsaatiginikuuiuk pappiaqqat killilimmik nalillit inuunerit ilumut imaqarnerulersissinnaaneraat? Amerlasuut taamaassoraat. Millionillit ulloq unnuarlu sulisarput sapinngisamik amerlanerpaanik aningaasarsiniarlutik. Ilaasa aningaasarsinissartik kiserluinnaat sammingaaramikku peqqinnertik, ikinngutitik allaallu ilaquttatik tunulliuttarpaat. Sumut iluaqutaava? Aningaasat — aningaasanilluunniit pisiarineqarsinnaasut — piviusumik ataavartumillu nalerisimaalersitsisinnaappat?

Misissueqqissaartartut aalajangiuppaat pigisanik pisaartornikkut nalerisimaarneq anguniarnerujartortillugu angujuminaannerujartortartoq. Aviisiliortoq Alfie Kohn inerniliivoq „nalerisimaarneq tuniniagaanngitsoq. . . . Inuit pigissaarnermik inuunerminni pingaarnerutitsisut, qaqutigoorluinnartumik isumaaloqqajaasartut isumatsaqqajaasarlutillu, tamatigullu allanit ilorrisimaannginnerusarlutik.“ — International Herald Tribune.

Misissueqqissaartartut ilaasa paasereeraat inuuneq siunertaqarnerusoq aningaasanit naleqarnerusoq, amerlasuut allatut isumaqarput. Tamanna tupigusuutissaanngilaq, inuit nunani killerni inuusut pilerisaarutinik ullut tamaasa 3000-it angullugit sunnerniarneqartarmata. Biilit mamakujuttulluunniit pilerisaarutigineqaraluarpata tusarliussaq ataasiuvoq: ’Una pisiariuk, taava pilluarnerulissaatit.’

Pigisanik pingaarnerutitsiuarnerup tamatuma kingunerisimavaa anersaakkut eriaginartut sumiginnarneqakulanerat. Atuagassiami Newsweek-imi ilanngutassiaq malillugu Kölnip biskoppiunera qanittukkut oqarsimavoq „nalitsinni inuusut Guuti oqaloqatigiissutigisarunnaarsimagaat“.

Immaqa nukitit tamaasa inuuniarninnut atorpatit misigisimallutillu allarpassuit piffissaqarfiginagit. Ilaannili immaqa misigisarputit peqqikkunnaarnissap utoqqaalinissallunniit tungaanut assigiiginnarmik inuusoqartariaqanngitsoq.

Inuuninni nalerisimaarneq annerusoq angusinnaassaviuk anersaakkut ittut pingaarnerutikkukkit? Suup inuunerit siunertaqarnerulersissinnaavaa?