Najoqqutassiamut aalajaannini toqussutigaa
„AUGUST DICKMANN 1910-mi inuusoq Jehovap Nalunaajaasuisa ilaat eqqaaniarparput.“ Eqqaassutissap (uani takutinneqartup) qanittukkut tigusanut inissiarsuusimasumi Sachsenhausenimi uleerneqartup oqaasertai taamatut aallartipput. Suup Jehovamut Nalunaajaasut ilaat eqqaassutissamik taamaattumik nersorneqartippaa? Tamanna allagartap sinnerata oqaatigaa: „Allat isiginnaartut septembarip 15-iani 1939-mi SS-init aallaaneqarpoq nalunngeqatiginnissutini pillugu naaggaarami.“
August Dickmann 1937-mi tigusanut inissiarsuarmut Sachsenhausenimut inissinneqarpoq. Sorsunnersuup aappaata 1939-mi aallartinneranit ullut pingasut qaangiuttut sakkutuunngoqqusissummik atsiortinniarneqarpoq. Taamaaliorumanngimmalli inissiarsuarmi sakkutuut naalagaata Heinrich Himmler, SS-ini (Schutzstaffel-ini, Hitlerip sakkutuuini immikkut sungiusakkani) naalagaanersaasoq, atassuteqarfigaa inissiarsuarmiittullu tamaasa isigitillugit Dickmannip toqunissaanut akuereqqulluni. Septembarip 17-ani 1939-mi The New York Times-imi allaaserisami Tysklandimeersumi allassimavoq: „August Dickmann, 29-nik ukiulik . . . sakkutuunit pillagassanik toqutsisartunit aallaaneqarsimavoq.“ Aviisi naapertorlugu tyskit nalunngeqatiginnissusertik pillugu sorsoqataajumanngitsut siullersaraat.
Ukiut 60-it qaangiuttut septembarip 18-iani 1999-imi, Brandenburgimi Eqqaassutissamik pilersitsisartut Dickmannip toqunera eqqaaniarpaat, eqqaassutissallu takusaasut paasitippai taassuma sapiissusianik upperneratalu sakkortussusianik. Tigusanut inissiarsuusimasup qarmaani silarlermi eqqaassutissap allap takusaasut eqqaasippai Dickmann tassaannaasoq Jehovap Nalunaajaasuisa 900-it missaaniittut Sachsenhausenimi upperisaminnik toqussuteqartut ilaat ataaseq. Inissiarsuarni allani allarpassuit taamatut atugarliortitaasimapput. Tigusanut inissiarsuarni allani allaat atugarliungaaraluarlutik amerlasuut Guutip najoqqutassiaanut aalajaattuarput.
Jehovap Nalunaajaasuinut ’naalakkersuisunut akimanernut naalattuunissaq’ kristumiutut akisussaaffiuvoq. (Rûmamiut 13:1) Naalakkersuisulli Guutip inatsisaanut unioqqutitsisinniaraluarpatik, apustilitut kristumiutut ima oqartutut qisuariartarput: ’Guuti inunnit naalattariaqarneruvoq.’ (apustilit suliait 5:29) Silarsuarmi naggueqatiginngisanut sorsunnerit uumissuinerillu amiilaarnangaartunik kinguneqarmata Jehovap Nalunaajaasui sumi tamaani August Dickmannitut kikkunnik tamanik eqqisseqatiginninniarsimapput. Biibilimi kajumissaarut malippaat: ’Ajortoq ilinnut ajugaatinnaveeruk, kisianni ajortumut ajunngitsoq sakkugalugu ajugaaniarit.’ — Rûmamiut 12:21. (wE 1/5 2000)