Guutip naalagaaffianik oqaluussissutiginninnermit nutaarsiassat

’Guutimi ajornartoqanngilaq’

OQAATSIT qulaani allaqqasut, Matîuse 19:26-mit tigusaasut, arnamut inuusuttumut Venezuelamiuusumut eqquussimapput. Jehovap tamakkiisumik tunaarineratigut ajornartorsiutini annertooq anigorsinnaasimavaa. Ima oqaluttuarpoq:

„Aanaga assut pitsaavoq asannittuullunilu. Ajoraluartumik 16-iinnarnik ukioqartunga toquvoq. Qimagunnera aliasuutigeqaara. Isummakkut allanngujasunngorpunga allaat illutsinnit aninissara silatitsinniinnissaralu nuannariunnaarlugu. Naggataatigut kikkut tamangajaasa nigorlugit inuulerpunga.

Atuarneq ajorpunga sulisarnangaluunniit. Ininniiginnartarpunga. Kiserliorlunga ikinnguteqarnangalu isumatsangaarsimavunga. Naleqanngilluinnartutut misigaanga suullu tamaasa qimallugit toquginnarusullunga. Imminut aperiuarpunga: ’Inuuneq sumik siunertaqarpa?’

Anaanama atuagassiat Napasuliaq Alapernaarsuiffik aamma Iteritsi! akuttoqatigiissumik arnamit inuusuttumit Giselamik atilimmit pisarpai. Ullut ilaanni Gisela angerlarsimaffipput saneqqukkaa anaanama takullugu aperaa uanga ikiorsinnaaneraanga. Gisela misiliiumavoq, uangali ilassiumanngilara. Giselamulli tamanna akornutaanngilaq. Allaffigaanga ikinngutigiumallunga allallu kinaassusillip pingaarnerungaartulli aamma ikinngutigiumagaanga paasitinniarlunga. Oqaluttuuppaanga tassaasoq Jehova Guuti.

Killitseqaanga allagaalu akerusulerpakka, qaammatinilu pingasuni allaffigeqatigiittarpugut. Uteriiserfigingaatsiareeraanga aatsaat naapinnissaanut sapiissuseeruppunga. Naapeqqaaratta Giselap atuakkamik pâratîsime nuname nâgssáungitsumik inûsínauvutit-mik atuaqqissaaqatigaanga. Atuaqqissaareeratta naalagaaffilersaarfimmi ataatsimiinnissamut qaaqquaanga. Tupaallaqaanga. Ukiummi sisamat angerlarsimaffinnit anisimanngilanga, aqqusinikkulluunniit pisunnissara eqqarsaatigiinnarlugu annilaartarpunga.

Giselap nikalluutinngilaanga. Qularunnaarsippaanga sumilluunniit annilaangassutissaqanngitsunga, ataatsimiigiarnissamullu ingiaqatigiumallunga. Naggaataatigut akuersiinnarpunga. Naalagaaffilersaarfimmut iseratta sajuttuinnanngorpunga kiakkerlungalu. Arlaannaalluunniit ilassisinnaanngilara. Taamaakkaluartoq ataatsimiinnernut najuuteqqinnissara akueraara, Giselallu aalajaalluni sapaatit-akunneri tamaasa aqqusaartuarpaanga.

Annilaangasarnera ajugaaffigitinniarlugu Giselap piffissaalluartukkut ataatsimiigiartarnerput isumagaa. Matup eqqaanut pilluta isertut tamaviisa ilassisarpavut. Taamaalillunga inuit ataasiakkaaginnarlugit marlukkuutaaginnarlugilluunniit ilassisarpakka, amerlasuukkuutaarnagit. Sapileraangama Giselap Matîuse 19:26-mi allassimasoq issuartarpaa, ima allassimasoq: ’Inunni tamanna ajornaqaaq, Guutimili ajornartoqanngilaq.’

Oqitsuunngilaq, kiisamili katersanut suli amerlanerusunut, tassa ataatsimeersuarnernut, najuussinnaanngorpunga. Uannut alloriarneq angisoorujussuuvoq. Septembarimi 1995-imi sapiiserlunga ilagiinni utoqqaanertat oqaloqatigaakka illumiit illumut oqaluusseqataaneq pillugu. Qaamatit arfinillit qaangiuttut, tassa apriilimi 1996-imi, Jehovamut tunniulluinnarsimanera imermi kuisinnikkut takutippara.

Tamatuma kingorna aperineqaraangama qanoq ilillunga taamaaliornissannut sapiissuseerussimanersunga akisarpakka: ’Jehovamik nuannaartitsiumanera annilaanganinnit anneruvoq.’ Suli isumatsattarpunga, pioneeritulli kiffartulersimanikkut nuannaarnerulersimavunga. Ilaanni Giselap oqaaserisimasai isumaqatigaakka. Maanna Ikinnguteqarpunga uannik soqutiginnittumik uannillu ’pissatsitsisumik’. — Filípimiut 4:13. (wE 1/6 99)

[Qupp. 28-mi assiliartaq]

„Jehovamik nuannaartitsiumanera annilaanganinnit anneruvoq“