Asanninneq anaanap asanninneranit nukittunerusoq

QIMUTTUITSUT unittarfiannut, perusuersartarfinnut kikkunnit tamanit atorneqartartunut imaluunniit aqqusinernut angallaffiusunut anaanat naalungiarsuutitik qimaannartarpaat. Ilaanni eqqagassat akornanni eqqaasut nassaarisarsimavaat naalungiarsit qiagaluarlutik anaanaminnit tusaaneqannginnamik qiajunnaarsimasut. Aviisimi O Estado de S. Paulo-mi allassimavoq ’taama naalungiarsunnik aqqusinernut qimaannaasarneq annertusiartuinnartoq’. Soorunami anaanat inuusuttut taama aalajangersimanertik kingornatigut peqqissimissutigisassavaat. Taamaattorli qimaannartarpaat naak meeqqat inuunerannik akeqarsinnaagaluartoq.

Immaqa oqarumassaatit: ’Qanoq ililluni anaanaasup meeqqani siunissamut nalorninartumut qimaannassallugu eqqarsaatigisinnaavaa?’ Biibilip pisut taama alianartigisut assersuutitut atorpai Pinngortitsisitta pigisaminut misigissusii itisuut paasitinniarlugit: „Arnap puigortarnerpaa qitornani milutsitani, anaanalluunniit erniarisani? Taakkuami puigussagaluarpataluunniit uanga illit puigussanngilakkit.“ — Jesaja 49:15.

Ilumut, anaanamit kimilluunniit Guutip asanerungaarpaatigut pisariaqartitavullu soqutigingaarlugit. Inuusuttuuguit inersimasuuguilluunniit, ajornartorsiutitit suugaluarpataluunniit, kisimiinngisaaannarputit. Pinngortitsisivit ikiornissat ajunngitsumillu ingerlanissat soqutigai. Tussiaasiortup ima oqaatigisimavaa: „Ataatamami anaanamalu qimakkaluarpannga [Jehovap] ilasiarissavaanga.“ — Tussiaat 27:10.

Nunarsuaq tamakkerlugu atuagassiat Napasuliaq Alapernaarsuiffik aamma Iteritsi! aqqutigalugit Jehova ’kisimi ilumut Guutiusoq’ erneralu Jesus Kristus ilisimaneqalertarput, ilisimassummillu tamatuminnga qujamasullutik ilassinnittunut tamanna naassaanngitsumik inuunissaamik kinguneqarsinnaavoq. — Juánase 17:3. (wE 1/12 98)