„Kina ima ilisimatuutigaa nuissat kisissinnaallugit?“
’Nuia samannga majortoq takusaraangassiuk erniinnaq oqararaasi: „Siallissavoq,“ taavalu taamaalisaraaq. Niggersorlu takugaangassiuk oqararaasi: „Kiatsissavoq,“ taavalu taamaalisaraaq.’ Jesusip oqaasii taakku, iivangkiiliumik allattup Lukasip allassimasai, itsaq Palestinami silassamik siulittuisarsimanermut assersuutissaapput. (Lúkarse 12:54, 55) Itsaq inuusut pissutsini aalajangersimasuni silap pissusiinik qimerluuinermikkut eqqortumik siunissamut qanittumut siulittuisinnaasarsimapput.
Uagut nalitsinni silasiornermik ilisimatuut nutaalianik atortorissaaruteqarlutik, soorlu qaammataasianik nunarsuarmik kaaviisunik, dopplerradarinik qarasaasianillu piginnaasaqarluartunik, piffissamut sivisunerusumut silassamik naatsorsuisinnaapput. Siulittuutaalli eqquutinngitsuukulasarput. Sooq?
Pissutsit amerlasuut silassamik eqqortumik naatsorsuisinnaanermik ajornakusoortitsisarput. Assersuutigalugu, kissassutsip nillissutsillu, isugutaap, silaannaap naqitsineqassusiata kiisalu anorip sakkortussusiata sammiviatalu siumut naatsorsuutigisaanngitsumik allanngoriataartarnerat ajornakusoortitsisinnaasarpoq. Aammattaaq seqernup, nuissat immallu imminnut sunneqatigiittarnerat, ilisimatuut suli paasilluanngisaat, pisooqataasarpoq. Taamaattumik silassamik siulittuineq suli ulloq manna tikillugu eqqortuaannartanngilaq.
Inuit sila pillugu ilisimasaasa killeqarnerata Jobip apeqqutigisimasaanik matuminnga eqqaasippaatigut: „Sialuk ataataqarnerpa? Kanernerillu kimit kinguaassiarineqarpat? . . . Nipit nuissanut anngutitissinnaaviuk ilinnut inuummarissaataasumik siallerfigitillutit? . . . Kina ima ilisimatuutigaa nuissat kisissinnaallugit? Kialu imeq qilaap imiisiviinit kuisarpaa?“ — Job 38:28-37.
Apeqqutinut tamakkununnga tamanut akissut tassaavoq: Inuk kinaluunniit pinnani, kisianni Jehova Guuti. Aap, inuit qanorluunniit silatorpasitsigigaluarpata Pinngortitsisutta ilisimassusia nallerneqarsinnaanngilaq. Taanna asannittuliorluinnarpoq ilisimassutsi Biibilip quppernerini uagutsinnut pissarsiarineqarsinnaatikkamiuk, ajunngitsumik ingerlasinnaaqqulluta. — Ussatit 5:1, 2. (wE 1/11 98)