Guutip Naalagaaffianik Oqaluussissutiginninnermit Nutaarsiassat
Makitajuilluni Jehovap aqqutigeqqusaanik maleruaajumaneq
„[JEHOVA] ujarsiuk nunap inuini makitajuitsortaasusi.“ Ukiut 2600-t sinnerlugit matuma siornagut pruffiiti hebriiariusoq Zefanias taama kajumissaarisimavoq, ullorlu manna tikillugu nunarsuaq tamakkerlugu inuit suli taama kajumissaarneqartarput. (Sefanja 2:3) Jehovamik ujaasineq qanoq paasisariaqarpa? Taamaaliussagaanni Guutimik uumasumik ilumoortutuamik, Jehovamik, ilisarseqqaartariaqarpoq. — Jeremia 10:10; Juánase 17:3.
Guutimulli iluarisaassagaanni ilisarsinerinnaq naammanngilaq. Guutimut iluarisaassagutta ilisarsinerput maleruartariaqarparputtaaq. Qanoq iliorluta? Makitajuilluta eqqarsariaaserput ileqqorisavullu Guutip najoqqutassiaanut naapertuussartariaqarpavut, soorlu misigisimasakkut tulliuttukkut Surinamimeersukkut ersertoq. — Evfisumiut 4:22-24.
Eddy, ilinniartitsisoq 30-kkut qeqqata missaannik ukioqartoq, apeqqutissaminut makkununnga akissutissarserusuttarsimaqaaq: ’Ullumikkut inuiaqatigiinni upperisarsiorneq qanoq pingaaruteqartigaa?’ aamma ’Biibili, atuagaq pisoqaq, ilisimatuussutsimut nutaanerusumut naapertuuppa?’ Jehovap nalunaajaasuisa pulaarmanni apeqqutillu tamakku Biibili tunngavigalugu akiumammatigik, Eddy tusarnaaqqissaarpoq. Allaat nalunaajaasut nassuiaaneri ilumoornersut misissorumallugu allattuivoq.
Siornatigut Eddy upperisarsiortunit ilagisartakkaminit ajoqersorneqarsimavoq Guutip aapakaanik allanngortitsiartuaarsimanera inoqalerneranik kinguneqarsimasoq. Taamaattumik nalunaajaasut atuagaq Livet — hvordan er det kommet her? Ved en udvikling eller en skabelse? (Inuuneq — qanoq ililluni pilerpa? Pinngoriartuaarnikkut imaluunniit pinngortitsinikkut?) neqeroorutigimmassuk, ingerlaannaq akuersivoq. Pinngortitsinermik oqaluttuap Biibilimeersup atuakkami ersarissumik nassuiarneqarnera maluginiartorujussuuaa. Biibili atuaqqissaartaleramiuk paasilerpaa sallusuissut nanisimallugu!
Maannali misilinneqalerpoq. Eddyp illoqatai tillittarlutillu unneqqaserluttuupput. Taamaattumik aalajangigassaqalerpoq: illoqatimi unneqqaserluttumik inooriaasiat malissanerpaa imaluunniit taamaaliornerat ajattorlugu Guutip ataqqinaatissaanut inooriaaseqalissanerpa? Silatusaarluni Eddyp kingulleq qinerpaa. Ikinngutipalaani qimallugit allamut nuuppoq. — 1 Korintumiut 15:33, 34.
Eddy naalagaaffilersaarfimmut ataatsimiigiartalerami sukkasuumik siumukalerpoq. Atisalersoriaatsimigut qallikkullu pikisarnermigut pitsaanerusumut allanngorpoq ikinngutinilu ilaquttanilu ilikkakkaminik oqaluttuuttalerlugit. Kingusinnerusukkut nuannaarnera suli annerulerpoq ’nutaarsiassamik nuannersumik’ tamanut oqaluusseqataasinnaatitaalerami. (Matîuse 24:14; apustilit suliait 20:20) 1996-imi decembarimi ulloq qilanaaringaarsimasaa nalliuppoq Jehovamut tunniulluinnarnini takutillugu imermut morsutsinneqarluni kuisikkami.
Ukiut tamaasa inuit peqqusersuitsut hundredetuusintilikkuutaat ’Jehova ujaqqullugu’ kajumissaarut qisuariarfigisarpaat. Taamaalillutik Ussatit 22:4-mi allassimasoq misigisarpaat, tassani allassimagami: „Guutimik mianerinninnerup qanilaarnerullu akissarsiarititaat tassaapput pisuussutit, ataqqinaat inuunerlu.“ Aap, sallusuissummik nuannarisaqartut makitajuillutik Jehovap aqqutigeqqusaatigut ingerlanermikkut maannakkut pilluaqqusaanerit taamaattut misigisarpaat, isumalluarlutillu maani nunarsuarmi naassaanngitsumik pilluaqqusaanissartik qilanaaralugu. — Tussiaat 37:29. (wE 1/8 98)
[Qupp. 29-mi nunap assingi]
(Allassimasut qanoq inissisimanersut naqitami takuneqarsinnaavoq)
Caraibiap Imartaa
GUYANA
SURINAM
GUIANA FRANKRIGIP PIGISAA
BRASILIA
[Suminngaanneernera]
Nunarsuaq: Mountain High Maps® Copyright © 1997 Digital Wisdom, Inc.