Kina pisuua?

INUPPASSUIT ajornartorsiutiminnut Guuti pisuutittarpaat. Biibilimi imaattumik ussateqarpoq: „Inuk sianiissusiata orlutittarpaa, taamaattorli tamatumunnga [Jehova] pisuutittarpaa.“ (Ussatit 19:3) Inuilli naalliuutaannut Guutimik pisuutitsinerup assigaa aalakoorluni biilimik ajutoornermut biililiortumik pisuutitsineq.

Guuti oqaatsimini, Biibilimi, inuiannut pitsaasunik unnersuussuteqarpoq. Atuakkap Guutimeersup tamatuma atuartarneratigut inatsisillu najoqqutassiallu tassaniittut malillugit inuunitsigut inuunermi nakkarfissat ilarpassui ingalassinnaavavut. Tamatuma akerlianik Guutip unnersuussutai malinnagit inuuneq ajortumik kinguneqartarpoq. Assersuutigalugu, nerivallaartut, pujortartartut, imigassartorpallaartut kanngunartumilluunniit inooriaaseqartut peqqissutsiminnik annertuumik ajoqusiisinnaasarput. (Lúkarse 21:34; 1 Korintumiut 6:18; 2 Korintumiut 7:1) Kristumiu apustili Paulus ima allassimavoq: ’Inuk siaruartikkani naapertorlugit katersuiumaarpoq. Uinimminummi siaruarterisoq uinimmit aserujassummik katersuiumaarpoq; anersaamulli siaruarterisoq anersaamit inuunermik naassaanngitsumik katersuiumaarpoq.’ — Galâsiamiut 6:7, 8.

Guutip inatsisai najoqqutassiaalu malillugit inuuneq pitsaaneroqaaq! Taamaaliorutta Guutip pruffiiti Esajas aqqutigalugu neriorsuutaata piviusunngornera misigisinnaassavarput: „Uanga tassa [Jehova], Guutit, iluaqutaasunik ilinnik ajoqersuisoq, ingerlavigisassakkut ingerlatitsisoq. Ilumulli inassutikka tusaaniarsimagaluarukkit taava eqqississutissat ilissagaluarpoq kuussuartut, iluassutsillu immap malingisut.“ — Jesaja 48:17, 18. (wE 1/8 98)