Kina silarsuup naalagaraa?

KIAP silarsuaq aquppaa? Taama aperineqaraluaruit qanoq akissagaluarpit? Inuit upperisarsiortut amerlanerit akissagaluarput ’Guuti’ imaluunniit ’Jesus’. Aviisimi The Freeport News-imi Bahamami Ilanngutassiaq akissuteqarpoq ikittuinnaat ilimagigunagaannik.

„Matuma silataani naqitaaqqamik nassaarpunga,“ ilanngutassiortoq aallartippoq. „Nalinginnaasumik tamakku sumiginnartarpakka, maannali aalajangerpunga taanna atuarniarlugu. Qulequtaa apeqqutaavoq: ’Kina silarsuup naalagaraa?’“ Naqitaaqqap Biibililersaarutip atuarneratigut arnap taassuma ilikkarpaa Guutip Jesusilluunniit silarsuaq manna aqunngikkaa, kisianni Diaavuluup aqukkaa. — Juánase 12:31; 14:30; 1 Juánase 2:19.

„Ajussutsimik ingasalluinnartumik takutitsisimanerat eqqarsaatigeriaruk,“ naqitaaraq taama nassuiaavoq. „Gasimik ipititsiviit, toqutassanik katersortitsiviit, innermik supoorussuit, napalmbombit atortullu amiilaarnaqisut allat atorlugit naakkittaaqalutik anniartitsillutillu toqoraasarsimapput. . . . Suumuna taama amiilaarnartigisumik iliuuseqarnissaannik imaluunniit allatut ajornartumik ajortuliorusulernissaannik sunnertarai? Eqqaarsaatigisimaviuk inunnik taama peqqarniitsigisumik iliuuseqartitsisartoq tassaasinnaanersoq pissaanilik ajortoq takussaanngitsoq?“ Tupaallannarpa Biibilip Satan ’silarsuup matuma naalagaa’-nik taammagu? — 2 Korintumiut 4:4.

Qujanartumik Satanip anersaapiluisalu piiagaanissaat qanillivoq. ’Silarsuaq pilerinartuilu nungujartorput; Guutilli peqqusaanik naammassinnittoq naassaanngitsumik atassavoq.’ (1 Juánase 2:17) Aap, Biibili neriorsuivoq Guutip piumasaanik iliorumasut silarsuarmi naapertuilluartumi naassaanngitsumik inuunissartik neriuutigisinnaagaat. (Tussiaat 37:9-11; 2 Pîtruse 3:13; sarĸúmersitat 21:3, 4) Qanoq oqiliallannartigissava Satanp anersaapiluisalu sunniiniapilunnerat peerpata.

Naqitaaqqamik issuaareernermi kingorna The Freeport News-imi ilanngutassiortoq ima naggasiivoq: „Nuannaarutigeqaara naqitaaraq atuarakku . . . silarsuarmi pissutsit isumakuluutigisimagakkit aamma kina silarsuarmut aqutsisuunersoq eqqarsaatigisimagakka.“ (wE 1/3 97)