Guutip naalagaaffianik tusarliussinermit nutaarsiassat

Atuarfimmi aalajangiussisaqartarneq imminut akilersinnaavoq

BIIBILIMI ima siulittuuteqarpoq: „Qitornatit tamarmik uannit, [Jehovamit], ajoqersorneqassapput, eqqissisimangaarlutillu inuussapput.“ (Jesaja 54:13) Oqaatsit „qitornatit tamarmik“ Guutip kiffaanut nunarsuarmiittunut tamanut atorneqarsinnaapput, ilaatigut meeqqanut inuusuttunullu. Ullumikkut kristumiut angajoqqaajusut meeqqatik ’Jehovamit ajoqersorneqarnissaat’ angerlarsimaffimmi kristumiullu ataatsimiittarneranni isumagisussaavaat.

Kristumiut inuusuttut atuarfinni assigiinngitsorpassuarnik unamminiarnartunik naapitassaqartarput. Qassiinik Biibilimiit ajoqersorneqaatigisaminnit aalajangiussisariaqartarput. Inuusuttut taama ilioraangata atuartunut ilinniartitsisunullu iluaqutaasinnaasarpoq, tamanna Mikronesiami misilittakkat takutippaat.

Manerassuup qeqertaani Tolimi Chuukimittumi ilinniartitsisut illoqarfiup atuarfiani atuartut atuarfiup iluartut-ulluannik nalliuttorsiutiginninnissaanut piareersaateqaqquaat aammalu peqataaqqullugit. Jehovap nalunaajaasuisa meerartaasa nalunngilaat tamatuma nassatarissagaa kusassaanerit atisallu aliortuaasuusaartitsisut ilisiitsuusaartitsisullu allallu anersaarsiornermut ileqqulersuutaasartunut attuumassuteqartunik ersersitsisut. Taamaattumik meeqqat ilerasuuteqaratik festerneq taama ittoq peqataaffigisinnaanngilaat.a

Angerlarsimaffimminni kristumiullu ataatsimiittarneranni Biibilimit ajoqersorneqarsimanertik tunngavigalugu paasivaat taama iliorneq Guutimit iluarisaanngitsoq — aamma aliikkusersuineq piinnarlugu peqataaneq. Taamaattumik meeqqat Barak, Jehovap Nalunaajaasuisa qeqertamut ajoqersuiartortitaat, ilinniartitsisunut erseqqinnerusumik aalajangiussimasaminnik nassuiaassippaat.

Ilinniartitsisut nassuiaatigineqartut tusareerlugit ataatsimiinnissamik allamik aaqqissuipput Barak ilinniartitsisoqatigiinnut tamanut oqaluttussanngorlugu. Ataatsimiinnermi tamatumani Barakip saqqummiuppai iluartut-ulluat suminngaanniit pilerfeqarneranik paasissutissat. Paasissutissat Napasuliaq Alapernaarsuiffiup Peqatigiiffiata atuagassiaataanniit arlalinnit atuagassianillu allanit pissarsiarai. Iluartut-ulluata pilerfia oqaluttuarisaaneralu upperisarsiornermullu tunnganera pillugit ilinniakkatik atuarfimmi ilinniartitsisut pisortaasullu tupaallatigeqaat. Pissutsit qanoq iliuuseqarfigissanerlugit ataatsimiissutiginiarlugu aalajangerput.

Ullualuit qaangiummata aalajangiussartik tupaallannartoq nalunaarutigaat. Iluartut-ulluannut piareersaatigineqartut tamarmik taamaatinneqarput. Ukioq tamanna atuarfiup iluartut-ulluat nalliuttorsiutigissanngilaa. Inuusuttut Jehovap nalunaajaasuisa taakkua atuarfimmi eqqortumik iliornissaminnik aalajangiussigamik angusaqarluassusiat! Inuusuttut annilaagasariaqanngillat imaluunniit kanngusuttutut misigisariaqanngillat sallusuissummik Biibilimeersumit aalajangiussigaangamik.

Nunarsuaq tamaat kaajallallugu Jehovap nalunaajaasuisa meerartatik atuarfimmi aallussilluartooqqullugit ilinniartittarpaat. Aammattaaq Biibilip najoqqutassai tunngavigalugit inuunissaminnik periarfissallu takkukkaangata ikinngutimik neriugisaminnik upperisaminnillu oqaluttuunnissaannik ilinniartinneqartarput. Naak matumatut taama pilertortigisumik imaluunniit pitsaatigisumik tamatigut kinguneqarneq ajoraluartoq, inuusuttut eqqortumik iliorniarnermikkut nuannaarneq nalerisimaarnerlu misigissavaat. Kisiannili tamanik pingaarnerusoq tassaavoq: qularutigissannginnamikku Ataatartik qilammiusoq nuannaartissagamikku aalajaallutik naalannerat pillugu pilluaqqusisussaq. (wE 1/12 96)

[Quppernerup ataani ilanngussaq]