„Tamatta ilaqutariippugut“
UPPERISARSIORNIKKUT paqumisunneq ammillu qalipaataa tunngavigalugu assigiinngisitsineq ukiuni kingulliunerusuni nunarsuarmut tamarmut siaruaassimavoq. Nagguikkut assigiinngissutit toqoraanersuarnik, naalliutsitsinermik allatullu peqqarniitsuliornernik pilersitsisimapput. Amnesty Internationalip nalunaarutaa naapertussagaanni inuit pisinnaatitaaffiinik unioqqutitsinerit pissutigalugit 1994-imi nunarsuaq tamakkerlugu inuit 23 milioninit amerlanerusut angerlarsimaffimminnit qimaasariaqarsimapput.
Rwandaannarmi inuit 500.000-t missingi toqorarneqarsimapput 2.000.000-inillu amerlanerusut qimaasariaqarsimallutik taamani tutsit hutullu akersuutillarmata. „Ingammik Jehovap nalunaajaasui qinugineqarput,“ Belgiamiut aviisianni Le Soir-imi allassimasoqarpoq, „sakkulisarumannginnamik.“ Jehovap nalunaajaasui sakkuaannernut peqataaneq ajorput. Taamaakkaluartorli ilaat arlalinnik hundredellit eqqissiviilliornerni toqutaapput. Tamatuma Jesusip ajoqersukkaminut oqaasiinik eqqaasippaatigut: ’Silamiut ilaginnginnamisi uumissorpaasi.’ — Juánase 15:19.
Ilaqutariit Jehovamut nalunaajaasuusut — Eugène Ntabana, nulia meeraallu marluk — illoqarfiit pingaarnersaanni Kigalimi taamanikkut najugaqarput. Eugène, piffissaq tamaat oqalussisartuusoq, kristumiutut kalluunnaveersaartuunerup isumaanik saniliminnut akuttunngitsumik nassuiaassisariaqartarsimavoq. (Matîuse 22:21) Bougainvillea, naasoq nermussorluni talliartortartoq, eqqartorajuttarsimavaa.
Ima oqartarsimavoq: „Maani Kigalimi bougainvillea aappaluttunik, aappaluartunik ilaannilu qaqortunik sikkertarpoq. Tamarmilli ilaqutariipput. Aamma inuit taamaapput. Qanorluunnit amerput qalipaateqaraluarpat, sumilluunniit naggueqaraluarutta, tamatta ilaqutariippugut, tamatta kinguaariinnut inunnut ilaagatta.“
Naak eqqissisimasumik pissuseqarlutillu kalluunnaveersaartuugaluarlutik ilaqutariit Ntabanakkut ajoraluartumik inunnit toqutsiumatuunit toqutaaput. Tamarmik aalajaallutik toqupput. Qularutiginngissinnaavarput Jehova Guutip neriorsuutini eqqortillugu taakku silarsuarmi paqumisuffiunngitsumi toqusunit makitikkumaarai. (apustilit suliait 24:15) Taamanikkussamut ilaqutariit Ntabanakkut allarpassuit ilagalugit ’eqqissinangaartoq nuannaarutigisinnaassavaat’. — tugsiaut 37:11.